"Lider" televiziyasında Murad Dadaşovun təqdim etdiyi 9-cu "Maşın" realiti-şousu gələn həftə yekunlaşır. İştirakçıların mübahisəli çıxışları ilə tamaşaçı marağını artıran proqram yaxın həftələrin birində təkrarən öz iştirakçıları ilə efirə çıxacaq.
Xatırladaq ki, hələ ötən il "Maşın"ın buraxılışına son qoyulduğunu və yeni layihələrlə efirə qayıdacağını deyən Murad Dadaşov tamaşaçı marağını nəzərə alıb, başqa bir addım atdı. O, yeni layihəsini hələ üzə çıxarmamağa qərar verdi. "Maşın" isə 9-cu sürəti ilə efirə qayıtdı. Budəfəki iştirakçılar bir o qədər məşhur olmasa da, realiti-şou onlara bu imkanı yaratdı. Əsasən Günel Məhərrəmova, Günel Ələkbərova, Sevda Yəhyayeva, Səidə Sultan onlara verilən bu imkandan səmərəli istifadə etdilər.
Murad Dadaşov seyrçi marağını nəzərə alaraq, "Maşın"ın növbəti buraxılışını daha baxımlı etmək niyyətindədir. Layihə rəhbərinin açıqlamasına görə, realiti-şou tezliklə köhnə iştirakçılarının iştirakı ilə efirə qayıdacaq:
"Verilişi izləyənlərə bəllidir ki, şounun 2-3 buraxılışı sıravi vətəndaşların iştirakı ilə təqdim olunub. Sonrakı təqdimatlar tanınmış simaların iştirakı ilə yayımlanıb. Bu qənaətə gəldik ki, bu dəfə bir qədər fərqli prizmadan çıxış edək. Artıq böyük bir heyət şouda bu günə qədər iştirak edən maraqlı iştirakçıların siyahısını hazırlayır. Hazırkı veriliş yekununu tapandan sonra onlara təkliflər ünvanlanacaq və tezliklə "Maşın"ın 10-cu sürətinə start veriləcək".
Buraxılışda bir sıra yeniliklər olacağını vəd edən Murad Dadaşov təfərrüatı ilə danışmaq istəmədi.
|
