Dünən Bakıda Qara Dəniz İqtisadi Əməkdaşlıq Təşkilatına (QDİƏT) üzv ölkələrin fövqəladə hallar nazirləri və müvafiq qurumların rəhbərlərinin toplantısı keçirilib. APA-nın məlumatına görə, toplantıya Ermənistan istisna olmaqla, QDİƏT-ə üzv ölkələrin nümayəndələri qatılıb. Tədbirin açılışında çıxış edən Azərbaycanın fövqəladə hallar naziri Kəmaləddin Heydərov Azərbaycanda fövqəladə halların aradan qaldırılması istiqamətində görülən işlərdən, bu sahədə qazanılan uğurlardan danışıb.
QDİƏT sədrinin nümayəndəsi, Azərbaycan XİN departament rəhbəri Altay Əfəndiyev texnogen problemlərin həlli istiqamətində əlaqələrin gücləndirilməsinə ehtiyac duyulduğunu, bu sahədə QDİƏT ölkələri arasında əməkdaşlığın inkişafı üçün böyük imkanlar olduğunu deyib.
Rusiya fövqəladə hallar nazirinin müavini Vladimir Puçkov bildirib ki, Qara dəniz hövzəsində fövqəladə hallarla mübarizə sahəsində əməkdaşlığı genişləndirməyə böyük ehtiyac var: "Hansısa hadisə baş verəndə biz birgə çıxış etməliyik. Əməkdaşlığımız fövqəladə halların aradan qaldırılmasında böyük önəm daşıyacaq".
Toplantının sonunda Altay Əfəndiyev və Vladimir Puçkov brifinq keçiriblər. A.Əfəndiyev deyib ki, tədbirdə ötən dövrdə görülən işlər və gələcəkdə atılacaq addımlar müzakirə olunub. Həmçinin fövqəladə vəziyyətlərdə birgə iştirakla bağlı fikir mübadiləsi aparılıb, sonda Bakı Bəyannaməsi qəbul edilib.
V.Puçkov əvvəlki iclasdan ötən üç il ərzində strukturda bir sıra dəyişikliklər baş verdiyini, yeni strukturların yaradıldığını deyib. Nazir müavini qeyd edib ki, toplantıda əməkdaşlıqla bağlı bir sıra təkliflər, layihələr nəzərdən keçirilib, əməkdaşlıq imkanları araşdırılıb: "Xilasetmə işləri ilə bağlı əməkdaşlıq davam etdiriləcək".
İştirakçılar daha sonra FHN Mərkəzi Aparatının binasına gedərək burada yaradılan şəraitlə tanış olublar. Nazirliyin Böhranları İdarəetmə Mərkəzində olan tədbir iştirakçılarına böhranları idarəetmə zalında olan nəzarətetmə sistemləri, müasir texnologiyalar barədə məlumat verilib.
Fövqəladə hallar nazirlərinin Bakı toplantısında iştirak üçün Azərbaycan Ermənistana rəsmi dəvət göndərib. Lakin onlar tədbirə qatılmayıblar. APA-nın xəbərinə görə, bu açıqlamanı Altay Əfəndiyev bildirib. Onun sözlərinə görə, Ermənistana dəvət Azərbaycan XİN xətti ilə göndərilib: "Ermənilərin iclasa hansı səbəbdən gəlmədiyi məlum deyil. Onlar bununla bağlı rəsmi məlumat verməyiblər. Ermənistanın bu tədbirdə iştirakı lazım idi. Biz onlara heç bir qadağa qoymamışıq. Gəlib iştirak edə bilərdilər".
|
