Dünən Ağır Cinayətlərə Dair İşlər üzrə Məhkəmədə "GEN" MMC-nin cinayət işi üzrə məhkəmə prosesi davam etdirilib. APA-nın məlumatına görə, prosesə sədrlik edən hakim Eynulla Vəliyev deyib ki, ötən məhkəmə iclasında təqsirləndirilən şəxslər mətbuatda gedən yazılara etiraz ediblər.
Məsələn, Elbrus Əliyev bildirib ki, bəzi mətbuat vasitələri proseslə bağlı həqiqətə uyğun olmayan yazılar çap edirlər: "Bu yazıların əksəriyyəti zərərçəkənlərin nümayəndəsi Vidadi İsgəndərov tərəfindən mətbuata ötürülür və nəticədə cəmiyyətdə ajiotaj yaranır. Vidadi İsgəndərov özünü 21-ci əsrin Xristofor Kolumbu kimi aparır. Belə davam etsə, biz Vidadi İsgəndərovun suallarına cavab verməyəcəyik. Bununla yanaşı, prosesdə iştirakdan imtina edəcəyik".
Hakim təqsirləndirilən tərəfə vəsatəti yazılı şəkildə məhkəməyə təqdim etməsini məsləhət görüb. Bundan sonra prosesdə iştirak edən mətbuat mənsublarının bəziləri ziddiyyət təşkil edən informasiyanı V.İsgəndərovdan aldıqlarını deyiblər. Məhkəmə protokola yazılmaqla V.İsgəndərova xəbərdarlıq edib.
Xəbərdarlığa etiraz edən və vəziyyəti aydınlaşdırmağa çalışan V.İsgəndərovla hakim arasında mübahisə yaranıb. Hakim V.İsgəndərovu prosesdən istifadə etməklə ictimai-siyasi kapital qazanmaqda ittiham edib. Bundan sonra V.İsgəndərov şifahi vəsatətlə çıxış edib. O bildirib ki, prosesin gedişatı ədalətli aparılmır, məhkəmə istintaqının obyektiv aparılmasına şərait yaradılmır. O, bununla bağlı MTN-ə məlumat veriləcəyini deyib.
E.Vəliyev isə deyib ki, məhkəmənin işindən verilən şikayət yazılı şəkildə olmalıdır. Prokuror prosesdə yaranan gərginliyi aradan qaldırmağa çalışıb. Prosesdə zərərçəkən qismində ifadə vermək üçün çağırılan Qalib Kərimov məhkəmə heyətinə etiraz edib. Hakim isə etirazı yazılı şəkildə əsaslandırmasının zəruriliyini deyib.
Təqsirləndirilən şəxslər: Elbrus Əliyev, Əliyar Abbasov, Həbib Ağayev, Nəbi Məmmədov, Mehparə Cəfərzadə, Asif Ələmov, İlkin Səfərov, Ramil Əliyev və Kamran Əhmədov CM 178.3.1 (dələduzluq - mütəşəkkil dəstə tərəfindən törədildikdə) və 178.3.2 (dələduzluq - külli miqdarda ziyanla törədildikdə) maddələri ilə ittiham olunublar. Cinayət işi üzrə 10 nəfər şəxs təqsirləndirilir, 373 nəfər zərərçəkmiş kimi tanınıb.
|
