Gürcüstanın Bolnisi rayonunun Faxralı kəndində köhnə məscid binasının bərpasına etiraz edən gürcü keşişləri rayon mərkəzində ARDNŞ-in törəmə müəssisəsi olan "SOCAR-Georgia"ya benzindoldurma məntəqəsi yaxınlığında aksiya keçiriblər. APA-nın Gürcüstan bürosunun məlumatına görə, keşişlər əllərində "SOCAR-Georgia"dan benzin alma!" sözləri yazılmış şüarlar tutublar.
Benzin doldurmaq üçün məntəqəyə gələn gürcü sürücüləri bundan çəkindirməyə çalışan keşişlər iddia ediblər ki, "SOCAR-Georgia" məntəqələrindən alınan benzinə görə ödənilən hər qəpik Gürcüstanın maraqlarına qarşı istifadə olunur (?). Onlar "SOCAR-Georgia"nın gürcülərə benzin satmaqdan əldə etdiyi qazanc hesabına "gürcü torpaqlarında" məscidlər tikdirdiyini bildiriblər. Dünən axşam bənzər aksiya paytaxt Tbilisidə və "SOCAR-Georgia"ya məxsus benzindoldurma məntəqələri yerləşən digər rayonlarda da keçirilib.
"Ayrı-ayrı insanların, müxtəlif konfessiya nümayəndələrinin hərəkətləri müxtəlif dini konfessiyaların bir-birinə qarşı düşmən mövqedə olduğu demək deyil". Bu sözləri APA-ya Gürcüstan prezidentinin müşaviri Mübariz Qarayev verib.
"SOCAR-Georgia"ya məxsus benzindoldurma məntəqələri qarşısında keçirilən etiraz aksiyalarına münasibət bildirən müşavir qeyd edib ki, Gürcüstan Konstitusiyasına görə, din dövlətdən ayrıdır: "Gürcüstan onun ərazisində fəaliyyət göstərən bütün konfessiyalara qarşı tolerant ölkədir. Bütün dinlərin nümayəndələri əsrlər boyu Gürcüstanda yanaşı yaşayıb, onların arasında heç bir zaman qarşıdurma olmayıb. Ayrı-ayrı insanların, konfessiya nümayəndələrinin hərəkətləri o demək deyil ki, bu və ya digər konfessiya bir-birinə düşmən mövqedədir".
Faxralı kəndində məscidin bərpası ilə bağlı etirazlara münasibət bildirən M. Qarayev deyib ki, bu məscid qədim tarixə malikdir: "Ayrı-ayrı individlərin hərəkətləri o demək deyil ki, hamı islama etiraz edir. Belə hərəkətləri dini narazılıq məcrasına yönəltmək olmaz".
Qeyd edək ki, Gürcüstanın azərbaycanlı rəsmisinin verdiyi diplomatik açıqlamaya baxmayaraq, de fakto keşişlər hansı məqamdasa hansısa siyasi çevrələrin sözünü deyirlər. Amma nədənsə həmin keşişlər və onların havadarları çox yaxın tarixi unudurlar. Ötən il Gürcüstan-Rusiya müharibəsində Ermənistandan fərqli olaraq Azərbaycan və Türkiyədən dəstək almış gürcülər azərbaycanlıların öz əzəli yurdlarında ibadətgahlarını təmir etməyə dözüm nümayiş etdirə bilmirlər. Ən maraqlısı da odur ki, gürcü keşişlər yəqin bilməmiş deyillər ki, qarşı çıxdıqları "SOCAR-Georgia" satışdan əldə etdiyi puldan Gürcüstan büdcəsinə vergi ödəyir, Gürcüstanda infrastruktur layihələri həyata keçirir.
Həmin şirkət və onun əməkdaşları "Ayna" əməkdaşının gözü qabağında - ötən il Qori bombalananda həyatlarını riskə ataraq şəhərdən çıxa bilməmiş əhalini zəruri qida, geyim və dərman preparatları ilə təmin edirdilər...
|
