BMT baş katibi Beynəlxalq Sülh Günü münasibətilə müraciət edib

BMT baş katibi Pan Ki Mun 21 sentyabr Beynəlxalq Sülh Günü ilə bağlı müraciət edib. BMT Azərbaycan nümayəndəliyindən APA-ya verilən məlumata görə, müraciətdə qeyd olunub ki, bu gün atəşkəsə və zorakılığa qarşı qlobal çağırış günüdür:

"Bu gün müharibənin dəhşətlərini və itkilərini, mübahisələri sülh yolu ilə həll etməyin borcumuz olduğunu dərk etmə zamanıdır. Konflikt qurbanlarının əksəriyyəti günahsız vətəndaşlar, atalar, analar və uşaqlardır. Sülhsüz bu insanların öz həyatlarını yaxşılaşdırmaq və yoxsulluqdan qurtulmaq üçün ümidləri çox azdır. Hətta gücsüzlərin mənafeyi üçün çalışan insanlar belə, tez-tez şiddət hədəfinə çevrilirlər". Baş katib deyib ki, biz millətlərarası müharibələrin azaldığına, əvəzində insanların diplomatiyaya və danışıqlara üz tutduğuna sevinməliyik: "Tarix göstərir ki, hətta daxili münaqişələrdən parçalanan dövlətlərdə belə, güclü iradə olduğu zaman sülh əldə edilə bilər. Bu Beynəlxalq Sülh Günündə mənim hər kəsə bir müraciətim var: Biz tərk-silah olub, sülhə nail olmalıyıq". я Bu arada isə Azərbaycanın BMT daimi nümayəndəliyinin rəhbəri, səfir Aqşin Mehdiyev qurumun baş katibi Pan Gi Muna rəsmi etiraz məktubu göndərib.

Nümayəndəlikdən APA-nın ABŞ bürosuna verilən məlumata görə, məktubda əsas diqqət sentyabrın əvvəllərində Ermənistan prezidenti Serj Sərkisyanın Azərbaycanın işğal olunmuş ərazilərinə səfəri, orada qondarma rejimin "müstəqillik gününə" həsr olunan tədbirlərə qatılması və Xankəndində verdiyi bəyanatlara yönəlib. Məktubda, Ermənistanın xarici işlər naziri Edvard Nalbadyanın və onu müşayiət edən yüksək rütbəli diplomatların işğal olunmuş ərazilərdə diplomatların ənənəvi müşavirəsini keçirdiyi də qeyd olunub.

Səfir Mehdiyev müraciətində bildirib ki, "Mənim təmsil etdiyim hökumət işğal olunmuş ərazilərə yuxarıda qeyd etdiyim səfərləri və orada səsləndirən hərbi ritorikanı Ermənistanla Azərbaycan arasında münaqişənin tez bir zamanda siyasi yolla həllinə açıq maneə kimi qiymətləndirir. Reallıqda Ermənistan bir daha öz anneksiya siyasətinə bəraət qazandırmağa və faktların kobud formada təhrif olunması yolu ilə beynəlxalq ictimaiyyəti çaşdırmağa çalışıb. Halbuki etnik mənsubiyyət əsasında qurulan marionet separatist rejimi dünya ölkələri tanımaqdan imtina edirlər".

Aqşin Mehdiyev qeyd edib ki, minlərlə insanın həyatına son qoyan, yüz minlərlə azərbaycanlını öz yurdlarından didərgin salan, iki dövlət arasında geniş miqyaslı müharibəyə səbəb olan bir hadisənin "yubileyi" münasibəti ilə mərasimlərə qatılan Ermənistan rəhbərliyi gözlənilməz nəticələr verə biləcək eskalasiya siyasətinə üstünlük verir. Daimi nümayəndəliyin rəhbəri BMT Təhlükəsizlik Şurasının, Baş Assambleyanın 14 mart 2008-ci ildə "Azərbaycanın işğal olunmuş ərazilərində vəziyyətə dair" qəbul etdiyi qətnamədə Azərbaycanın ərazi bütövlüyünün birmənalı olaraq və şərtsiz tanındığını, münaqişənin həllində bu prinsiplərin toxunulmaz olduğunu bildirib.

Baş katibə müraciətin sonunda səfir Mehdiyev qeyd edib ki, "Ermənistan Respublikası başa düşməlidir ki, onun öz maraqları üçün, regionda sülhün, əmin-amanlığın, qarşılıqlı əməkdaşlığın təmin olunması üçün münaqişənin Azərbaycanın ərazi bütövlüyü və sərhədlərinin pozulmamağı çərçivəsində həllinə alternativ yoxdur. Azərbaycan Respublikası heç vaxt öz ərazi bütövlüyünə xələl gətirəcək, öz xalqının hüquqi maraqlarına və indiki status-kvonun leqallaşmasına xidmət edəcək addım atmayacaq".

Səfir Mehdiyev baş katibdən bu məktubun BMT Baş Assambleyasının 64-cü sessiyası və BMT Təhlükəsizlik Şurasında yayılmasını xahiş edib.