Maliyyə Nazirliyinin apardığı araşdırmalar nəticəsində aşkar edilib ki, ölkənin şəhər və rayonlarında fəaliyyət göstərən musiqi məktəbləri və gimnaziyalarda işləyən pedaqoji işçilərdən 172 nəfərin diplomu, 4 nəfərin isə adına tərtib olunmuş arayışlar saxtadır. Həmin diplom və arayışlar əsasında musiqi məktəbləri və gimnaziyalarda işləyən müəllimlərə qanunsuz olaraq ümumilikdə 692 567 manat əməkhaqqı ödənilib. Odur ki, bu faktlar üzrə Cinayət Məcəlləsinin müvafiq maddələri ilə cinayət işi başlanıb.
Baş Prokuror Yanında Korrupsiyaya Qarşı Mübarizə İdarəsi tərəfindən aparılmış istintaqla müəyyən edilib ki, Gəncə Musiqi Texnikumunun adından verilmiş və rayon musiqi məktəblərindən götürülmüş 1126 ədəd diplomdan 101-i və 3 arayış, Azərbaycan Milli Konservatoriyasının nəzdində fəaliyyət göstərən Musiqi Kollecinin adından verilmiş 533 diplomdan 31-i, Naxçıvan Musiqi Texnikumunun adından verilmiş 20, Sumqayıt Musiqi Texnikumunun adından verilmiş 8 diplom və ümumilikdə 172 şəxsin adına rəsmiləşdirilmiş diplom və arayışlar həmin musiqi müəssisələri tərəfindən verilməyib.
İstintaq müəyyən edib ki, müəllimlərin bir qismi musiqi texnikumu və kolleclərini bitirmələri barədə saxta diplomları Yevlax şəhər 1 saylı Musiqi Məktəbinin direktoru Bəylərov və Fərzəliyevdən alıblar. Hər iki şəxs məsuliyyətə cəlb edilib. Cinayət işi üzrə məhkəmə prosesi Ağır Cinayətlərə Dair İşlər üzrə Məhkəmədə hakim Azər Orucovun sədrliyi ilə keçirilir.
Azərbaycanda bir sıra musiqi məktəbləri və gimnaziyalarda işləyən pedaqoji işçilərin adına saxta diplomların, arayışların yazılmasında təqsirləndirilən Yevlax şəhər 1 saylı Musiqi Məktəbinin direktoru Bəylər Ağalar oğlu Bəylərovun və Yevlax şəhər sakini İlham Fərzəli oğlu Fərzəliyev müttəhimlər kürsüsündə əyləşiblər.
Bəylər Bəylərov CM 311.3.1-ci (rüşvət alma) və 320.1-ci (rəsmi sənədləri saxtalaşdırma, hazırlama, satma və ya saxta sənədlərdən istifadə etmə), İlham Fərzəliyev isə göstərilən maddələrlə yanaşı 178.2.4-cü (dələduzluq) maddəsi ilə ittiham olunurlar.
Müəllim - rüşvətxor, müəllim - saxtakar, müəllim - dələduz... Çox ağır ittihamlardır. Millətin övladlarının yetişdirilməsi bunlara tapşırılmışdır. Nə isə... Məhkəmə davam edir.
|
