11-13 sentyabr 2009-cu il Azərbaycan idmanı tarixində əlamətdar bir dönəm kimi yadda qalacaq. Həmin gün Azərbaycanın 5 cüdoçusu Ermənistan paytaxtı İrəvanda keçirilən gənclərin cüdo üzrə Avropa çempionatında böyük tarixi uğura imza atdılar. İdmançılarımızın uğurlu çıxışı sayəsində ölkəmizlə müharibə şəraitində olan Ermənistan paytaxtında bayrağımız qaldırıldı, dövlət himnimiz səsləndi.
İrəvanda keçirilən Avropa çempionatı gənc cüdoçularımızın ən uğurlu yarışı kimi də yaddaqalan oldu. Belə ki, idmançılarımız budəfəki qitə birinciliyində 1 qızıl, 1 gümüş və 3 bürünc medal qazandılar.
Gözəl çıxışı ilə İrəvan tamaşaçılarına göz dağı olan, Azərbaycan idmansevərlərinin isə sevimlisinə çevrilən Elmar Qasımov (100 kq) bütün rəqiblərini üstələyərək, qitə çempionu olub. Digər cüdoçulardan İlqar Müşkiyev (55 kq) gümüş, Rasim Əsədullayev (60 kq), Fəqan Eminoğlu (66 kq) və Ramin Qurbanov (81 kq) isə bürünc medala layiq görülüblər.
Gənc cüdoçuların Avropa birinciliyində qazandıqları bu tarixi uğura dövlət də biganə qalmadı. Avropa çempionatında Azərbaycanın idman şərəfini uca tutan və bayrağımızı qaldıran milli komandamızın üzvləri dövlət səviyyəsində mükafatlandırıldı. Bununla əlaqədar Milli Olimpiya Komitəsinin inzibati binasında xüsusi tədbir keçirildi. Tədbirdə çıxış edən Azərbaycan Cüdo Federasiyasının prezidenti Füzuli Ələkbərov idmançılarımızın adi bir Avropa çempionatında deyil, Ermənistanda keçirilən yarışda psixoloji təzyiq altında çıxış edərək yüksək nailiyyət qazandığını xüsusi qeyd etdi.
Beləliklə, qızıl medal qazanmış Elmar Qasımova 50 min manat, onun şəxsi məşqçisi Əli Dərvişova 12 min 500 manat, gümüş mükafatçı İlqar Müşkiyevə 40 min manat, onun şəxsi məşqçisi Tərlan Həsənova isə 10 min manat mükafat verildi. Bürünc medallar qazanmış Fəqan Eminoğlu, Rasim Əsədullayev və Ramin Qurbanovun hərəsinə 30 min manat olmaqla mükafat təyin olundu. Müvafiq olaraq onların şəxsi məşqçiləri Rəşad Məmmədov, Ceyhun Əliyev və Əli Dərvişovun hərəsinə 7 min 500 manat mükafat verildi.
Əsas milli komandanın baş məşqçisi Ağayar Axundzadə, gənclərdən ibarət yığma komandanın məşqçiləri Fərhad Məmmədov və Azər Şıxəliyevin hərəsinə 11 min manat mükafat təqdim olunub.
|
