Serial təkcə Bakı teleməkanında çəkilmir

Regional telekanallar arasında Gəncənin "Kəpəz"i son zamanlar bir sıra uğurlara imza atıb. "Kəpəz" Müstəqil Teleradio Şirkətinin baş redaktoru Fuad Cabbarovla bu barədə söhbət edirik.

- "Kəpəz" Müstəqil Teleradio Şirkəti Gəncə şəhərində fəaliyyət göstərir. Televiziyada əvvəlcə musiqili-əyləncə proqramları hazırlanırdı. 4 iyun 2008-ci ildə "Kəpəz" televiziyası öz formatını dəyişdirdi. Yeni inkişaf dövrünə qədəm basan televiziyada birinci iş yayım keyfiyyətini yaxşılaşdırmaq, yeni müasir avadanlıqlarla təchiz etmək idi. Daha sonra televiziyada işləmək üçün istedadlı gənclər cəlb olundu. Efirdə yeni simalar göründü, tamaşaçılara maraqlı verilişlər təqdim edildi. Bu gün efirdə yayımlanan proqramlarda cəmiyyətdə aktuallığını saxlayan mövzularla yanaşı hüquq, səhiyyə, mədəniyyət və tariximizlə bağlı maarifləndirici xarakterdə verilişlər də yayımlanır.

Televiziyamızda hazırda 25 layihə həyata keçirilir. Onlardan bir neçəsi digər region kanallarında da yayımlanır. 4 iyun 2009-cu ildə isə "Kəpəz" Televiziyası öz veb-saytını yaratdı. Telekanalın həmin gün istifadəyə verilən www.kereztv.az saytı onun fəaliyyəti haqda bütün məlumatları özündə əks etdirir.

Bu gün Azərbaycanda olan iqtisadi inkişafı televiziyaların artmasında da görmək olar. Bu da öz növbəsində yeni iş yerlərinin açılması və regionun siyasi, iqtisadi və mədəni həyatında baş verən bütün proseslərin operativ olaraq tamaşaçılara çatdırılması deməkdir. Bizim də məqsədimiz televiziya sahəsində bir çox uğurlara imza ataraq, yeni zirvələr fəth etməkdədir.

- Fuad müəllim, maraqlıdır: necə oldu ki, televiziya sahəsinə gəldiniz?

- Artıq 17 ildən çoxdur televiziya sahəsində çalışıram. Məktəbi bitirəndən sonra televiziyada işləmək arzusunda idim. Əsgərlikdən sonra arzum gerçəkləşdi və mən televiziya həyatına qatıldım.

REKLAM

Bu sahədə çalışdığım üçün fəxr edirəm. Həyatımı televiziyasız təsəvvür edə bilmirəm.

- Bizdə olan bilgiyə görə, ilk dəfə olaraq kukla teleserialı məhz Sizin televiziya tərəfindən çəkilir. Bu layihə kimin ideyası idi?

- Belə deyərdim, bu, zamanın bir tələbi oldu. Televiziyamızda müxtəlif səpkilərdə layihələr var idi. Ancaq çox istəyirdik ki, hazırlayaq. Biz Gəncə Dövlət Kukla Teatrının aktyoru Zülfiyyə Əliyevaya müraciət etdik. O, bizə "Dostlar" serialının ssenarisini təqdim etdi. Ssenari qəbul olundu və bundan sonra Gəncə Dövlət Kukla Teatrının kollektivi bu işə cəlb edildi. Dekorasiya tərtib olundu, tamaşa üçün xüsusi olaraq kuklalar hazırlandı, mahnı yazıldı. Mahnının bəstəkarı Cahangir Zülfüqarov oldu. Bu serialda Azərbaycan xalq nağıllarının qəhrəmanlarını, eləcə də real həyatdan götürülmüş personajları görmək olar. Serial 4-7 yaşlı tamaşaçılar üçün nəzərdə tutulub. Bu serialın cəmiyyətə çatdırılması yolunda bizə yardımçı olan insanlara öz təşəkkürümü bildirirəm.

- Çəkiliş zamanı hansı çətinliklərlə üzləşirsiniz?

- Başlanan hər yeni işdə çətinlik olur. Nəzərə alsaq ki, bu serial Azərbaycan teleməkanında ilk işdir və Bakıda yox, regionda, yəni Gəncə şəhərində istehsal olunur, əlbəttə, müəyyən çətinliklərlə üzləşirik. Layihə buraya cəlb olunan bütün insanlar - aktyor, rejissor, operator və başqaları üçün yeni bir işdi. Bu cür layihə üzrə heç kimin təcrübəsi yoxdur. İstənilən nəticəni əldə etmək üçün çox çalışmaq lazım gəlir. İşimizə məsuliyyətlə yanaşdığımız üçün elə olur ki, bir seriyanı bir neçə günə çəkirik.

- Premyera nə vaxta gözlənir və teleserial başqa kanallarda yayılacaqmı?

- "Dostlar" kukla serialı yeni televiziya mövsümündən - sentyabr ayının 6-dan "Kəpəz" televiziyasında yayımlanır. Növbəti seriyalar da nəzərdə tutulan günlərdə, yəni hər bazar saat 10:00-da azyaşlı tamaşaçılarımıza təqdim olunacaq. Bu serial başqa regional telekanallarda da yayımlanacaq. Bunlar Şəkinin "Kanal S", Xaçmazın "Region TV", Lənkaranın "Cənub TV" kanallarıdır.