Dostunu qətlə yetirməkdə ittiham olunan Ağcabədi rayon Kəbirli kənd sakini Rafiq Cəlilovun məhkəməsi başa çatıb. Ağır Cinayətlərə Dair İşlər üzrə Məhkəmədə hakim Dadaş İmanovun sədrliyi ilə keçirilən prosesdə Rafiq Cəlilova 13 il cəza təyin olunub.

İttihama görə, ötən ilin dekabrında toy məclisində yeyib-içən Rafiq Cəlilov spirtli içkinin təsiri ilə ən yaxın dostu, Kəbirli kənd sakini Ədalət Möhsümovu bıçaqlayaraq öldürüb.

Müəyyən edilib ki, Rafiq Cəlilov Ədalətlə toyda 1 litrə qədər spirtli içki qəbul ediblər. Axşamüstü toy sahibi ilə aralarında mübahisə yaranıb. Rafiq toy sahibinin üstünə bıçaq çəkən zaman dostu Ədalət araya girib və nəticədə bıçaq Ədalətin ürək nahiyəsindən dəyib. Ədalət Möhsümov hadisə yerində dünyasını dəyişib.