Suğra Bağırzadə: "Qızıl güllə işləmək çox maraqlıdır"

Onu hamı 1959-cu ildə SSRİ-də, Moskvanın Böyük Akademik Teatrında Qəmbər Hüseynlinin "Cücələrim" mahnısı ilə çıxış edəndə tanıdı. O zaman o, iri yaşıl gözləri, uzun hörükləri olan bir qızcığaz idi. Və Mayestro Niyazinin rəhbərlik etdiyi simfonik orkestrlə çıxış edən bu balaca qızı çıxışdan sonra Moskva publikası üç dəfə səhnəyə geri çağırıb. Onun ifasında "Cücələrim" mahnısı doğma Azərbaycanın hüdudlarından kənarda da çox eşidilib. "Cücələrim" o dövrdə əsl hitə çevrildi, bu qız isə "Dünyanın ən gözəl səsləri" albomuna daxil oldu. Söhbət Əməkdar incəsənət xadimi Suğra Bağırzadədən gedir.

Suğra Bağırzadə bu gün ixtisasca mühəndisdir, Azərbaycan Neft və Kimya İnstitutunu bitirib. Bir vaxt "Ulduz" filmində Yetəri oynayıb. Bundan başqa ən azı 10 filmdə çəkildi. Hazırda isə "Azərbaycanfilm" kinostudiyasında texniki şöbənin böyük mühəndisi vəzifəsində işləyir. Kino karyerasında durğunluq yarananda isə güllərə üz tutdu. Onun əvvəllər güllərlə işləmək həvəsi kimi başlanan hobbisi tədricən daha bir peşəyə keçdi. Təbii güllərdən yaratdığı kompozisiyalar ona floraçı-rəssam şöhrəti gətirdi.

Suğra Bağırzadə təbii materiallar üzərində iş zamanı özünəməxsus metodikadan istifadə edir. Kompozisiyaların yaradılması üçün təbii güllər, ağac kökləri, saman və digər bitki materiallarından istifadə olunur. Onlar poliviasetat yapışqan əsasında hazırlanmış qarışıqla emal olunur. Güllərin son qurudulması hazır kompozisiyada baş verir.

REKLAM

Bəzi bitkilər ilkin işləmə zamanı öz təbii rənglərini itirir, buna görə də onların bərpası üçün xüsusi yağlı boyalardan, temprdən və akvareldən istifadə olunur. Rəsmlərin əsasını faner, DSP, kətan, kağız, qum, duz təşkil edir. Bəzən kompozisiyaların tamlığını göstərmək üçün fon boyalarla işlənir.

Onun gözəl rəsm əsərləri var, onlar poetik adlar daşıyır. "Bəyaz gecələr", "İtməyən gözəllik", "Səmaya doğru", "Qu gölü", "Qızılgül və mirvari", "Yasəmənli buludlar", "Səhrada həyat"... Onun əlləri bu gözəl güllərə ikinci həyat bəxş edir.

- Xoş gördük, Suğra xanım! Səhv etmirəmsə, bizim üçün şad xəbəriniz var. Sammitlərdə iştirakınız davam edirmi?

- Bəli, mən 2003-cü ildən Floridada yerləşən Ümumdünya Floristlər Sammitinin üzvüyəm. Bu floristlər birliyinin üzvləri mənim əl işlərimi internetdə görmüşdülər. 2004-cü ildə Latviyanın paytaxtı Riqa şəhərində bu birliyin sammiti keçirilirdi. Mən də bu sammitdə öz fərdi sərgimlə çıxış etməyə dəvət olunmuşdum. Həmin sərgimdə mən iki sertifikatla "Floristikada yeni və peşəkar istiqamət"lə təltif edildim. Bu mənim üçün işlərimin qəbul olunması idi. Ondan sonra məni bütün sammitlərə dəvət edirlər. Çalışıram ki, imkan dairəsində onlarda iştirak edim. 2007-ci ildə Fransanın Nitsa şəhərində keçirilən sammitdə iştirak etdim və bir daha iki sertifikatla təltif olundum.

Bu yaxınlarda - avqustun 29-dan sentyabrın 4-dək Malayziyada keçirilmiş sammitdə də iştirak etdim. Sammitdə master-klasslar, fərdi sərgilər keçirildi. Fərdi sərgimdə 30-a yaxın rəsm əsərinin nümayiş olunmasına baxmayaraq, bu dəfə özümlə cəmi iki iş aparmışdım, çünki onları hava limanında baqaja vermək çətinlik törədir. Bu sammitə 27 ölkə daxildir. Azərbaycan bu sammitdə yeganə türkdilli ölkə kimi iştirak edir. Hər dəfə hansısa ölkəyə səfər edəndə özümlə milli şirniyyatlarımızı aparıram. Qeyd edim ki, xaricilər xüsusilə şəkərbura və paxlavanı çox sevirlər. Bundan başqa, özümlə çoxlu bukletlər və kitablar da aparıram.

- Bəs bu sammitin Azərbaycanda keçirilməsi nə qədər mümkündür? Maraqlı olardı, məncə.

- Bu mənim arzumdur. Bu sammitin Azərbaycanda keçirilməsi üçün iki il öncə tələbnamə verməliyik. Ümid edirəm ki, yuxarı təşkilatlar bu işdə mənə dəstək olarlar.

- Maraqlıdır, floristika başqa üslublardan nə ilə fərqlənir?

- Floristlər öz incəsənət əsərlərini təbii güllərdən hazırlayır. Və mən sammitdə yeganə iştirakçıyam ki, güllərdən rəsm əsərləri yaradıram. İş prosesində əsas şərt odur ki, güllər təravətli, yeni açılmış olsunlar. Qızıl güllə işləmək çox maraqlıdır. Bu, yeganə güldür ki, onunla işləsən, gül mütləq açılmış vəziyyətdə olmalıdır. Bir də qızıl gül müqəddəs gül hesab olunur. Və bu gül hər zaman mənim üçün yaradıcılıq və təmizlik simvolu olub. Ağ və qızılı rənglər müqəddəs Məkkənin rəngləridir.

Sözsüz ki, düzgün fon seçmək üçün, rəsm əsərinin diri görsənməsi üçün xeyli zaman və səbat tələb olunur. Deyilənə görə, mən bunları başardım və sevimli məşğuliyyətim yaradıcılığa çevrildi.