Fəxriyyə Xələfova plastik əməliyyatlara ehtiyac duymur

"1969-cu ildə doğulmuşam və bu günə qədər heç bir plastik əməliyyat keçirməmişəm. Lakin plastik əməliyyat dəbə düşəndən sonra mənim də adım həmin insanlarla bir siyahıda səslənməyə başladı. Mən hansısa bir plastik əməliyyat etdirməmişəm. Bu şübhələrin yaranmasına mənim üz cizgilərim səbəb ola bilər. Üz cizgilərimin də səbəbkarları mənim valideynlərimdir" deyən əməkdar incəsənət xadimi, modelyer Fəxriyyə Xələfova bildirir ki, atası və anası zahirən çox gözəl insanlardır. Onların gözəlliyi övladlarına sirayət edib:

"Bir dəfə təsadüfən Toğrul Nərimanbəyovla rastlaşdım. O uzun zamandır Parisdə yaşayır, buranın ictimaiyyəti ilə o qədər də tanış deyil. Toğrul Nərimanbəyovu proqrama dəvət etmək üçün ona yaxınlaşdım. Onun anası fransızdır və modelyer olub. O mənə baxanda birinci sözü o oldu ki, "sizin nə gözəl fakturanız var. Mən sizin mütləq portretinizi çəkməliyəm". O an onu heç bir şey maraqlandırmırdı, o sonradan bildi ki, mən Fəxriyyə Xələfovayam. Bu qədər peşəkar rəssamı plastik əməliyyatlı xanım cəlb edə bilməz. O hətta dedi ki, "mən indiyə qədər çox üzlər görmüşəm, ancaq siz heç kimə bənzəmirsiniz".

Fəxriyyə xanımın qadın ətri istehsalı ilə məşğul olduğu barədə yazmışdıq. Lakin Azərbaycanda bir çox brendlər öz mağazalarını açsalar da, Fəxriyyə Xələfova belə bir arzuya düşməzdən əvvəl onun maddi tərəfini düşünür:

"Mən də çox böyük məmnuniyyətlə butik açardım.

REKLAM

Ancaq bunun iqtisadi tərəfi var. Bunun üçün sərmayə lazımdır. Mən sponsor anlayışından yox, investisiya anlayışından danışıram. Sponsor qısamüddətli bir maddi yardımdır. Amma investisiya uzunmüddətli kapital qoyuluşudur. Mən də bu uzunmüddətli kapital qoyuluşunu gözləyirəm. Mən istəyirəm ki, brendimə uzunmüddətli investisiya olsun. İnvestisiya olmalıdır ki, 15 çeşidi istehsala buraxa biləsən. Çox istərdim ki, qızıl əşyalarım, saatlarım da istehsal olunsun. Dünyanın hər yerində belədir. Bizim ictimaiyyətin əksəriyyəti heç bilmir ki, Valentino, Quççi və İfsen Loran bir sahibin markasıdır. Onların rəhbəri nə Valentinodur, nə də mərhum İfsen Lorandır. Modelyer heç vaxt təkbaşına bu qədər biznes imkanlarını özünə yarada bilməz. Əslində mənim üçün butik açmağın vaxtı yetişib. Ancaq hazırda şəhərin mərkəzində bir yer almağa imkan hələlik yoxdur. Düşünürəm ki, Fəxriyyə Xələfovanın butiki şəhərin lap mərkəzində olmalıdır".

Söhbət zamanı modelyerdən Parisdə və Milanda bir modelyerin geyimlərinin nümayişinin neçəyə başa gəldiyi ilə maraqlandıq. Bu barədə geniş informasiyaya malik olan Fəxriyyə xanım vurğuladı ki, moda həftələrində ən bahalı nümayişlər Paris və Milandır:

"Orada ən üst kateqoriyalı moda evləri təqdim edilir. Parisdə "Cristian Dior" moda evi, "Chanel" moda evi, "Valentino" və "İfsen Loran" moda evlərinin geyim nümayişi təşkil edilir. Konkret olaraq moda həftəsində bir moda nümayişinə 70 min avrodan 100 min avroya qədər vəsait sərf olunur. Bu məbləği də yalnız maliyyə qurumları verə bilər. Sadəcə, bu moda həftələrindən sonra artıq bütün dünya bilir ki, bu modelyer hansı istiqaməti, hansı rənglər və çalarları təqdim etdi. Bundan sonra həmin istiqamət, rəng və çalarlar çox reklam olunur. Milan moda həftəsi çox bahalı moda həftəsidir. Azərbaycanlı modelyerlərə gəlincə, hazırda bizim imkanlarımız ancaq festivallar keçirməyə çatır. Moda həftəsi bizim üçün çox böyük rəqəmdir.