Bura Gəncənin şəhər mərkəzindən bir qədər aralıda yerləşir. XXI əsrin 2-ci onilliyini haqladığımıza baxmayaraq, bu "basalağın" kanalizasiya sistemi yoxdur. Bu olmadığından sakinlər çirkab sularını açıq arxlara axıdır. Şəhərin Xaqani, Aqil Məmmədov, Mehdi Hüseynzadə, Səməd Vurğun, Dadaş Bünyadzadə və Şəddadilər küçələrinin hər iki tərəfindən axan çirkab sularının yaratdığı qoxu və görüntü azmış kimi, yağmurlu havalarda arx dolaraq daşır. Sakinlər problemlə bağlı dəfələrlə aidiyyəti qurumlara müraciət etsələr də, bunun heç bir nəticəsi yoxdur.
Sakinlər deyir ki, əvvəllər həftədə heç olmasa bir dəfə zibil maşını yolunu bu tərəflərdən salırdısa, artıq son 5-6 ayda buralarda zibilin daşınmasını görən olmayıb. Sakinlər zibillərini də arxa axıtmalı olurlar. Bu küçələrdə ürəkbulandırıcı bir vəziyyət yaranıb.
Bütün bunlar azmış kimi, sakinlər daha bir fəlakətlə üz-üzə qalıblar. Belə ki, küçəyə 1969-cu ildə çəkilmiş su təchizat sistemi bərbad hala düşüb. Ana borudan evlərə çəkilən su xətləri arxın aşağı hissəsindən keçdiyindən, zaman ötdükcə çürüyüb. Nəticədə çirkab suları bu xətlər ilə ana boruya keçir. Xaqani küçəsinin sakini Əlişir Azəri deyir ki, cari ilin aprel ayından bəri evlərə verilən sular... kanalizasiya suyu ilə qarışır. Kranlardan çıxan qara və qırmızı qurdlar göstərib ki, bu su gerçəkdən kanalizasiya suyudur.
Digər sakin Hüseyn Hüseynov sürücü işləyir və onun orta aylıq qazancı 120 manat təşkil edir. 4 nəfərdən ibarət ailə üzvü olan Hüseyn Hüseynov hər zaman maşın ilə su gətizdirə bilmir. O deyir: "Tək mən deyiləm, neçə-neçə şəhər sakini imkansızlıqdan bu sudan istifadə edir. Biz sanki bu şəhərin sakini deyilik. Bizi sayıb bu problemlə maraqlanan yoxdur".
Tünzalə Hüseynova II qrup əlil qızı ilə birgə yaşayır. Evi üçün təmiz suyu digər küçələrin evlərindən vedrə ilə daşımağa məcburdur. "Bütün günü əlimdə vedrə o qonşudan, bu qonşudan su daşıyıram. Bir ara fasilə verib, məcbur olub, bu sudan istifadə etməyə başladım, vallah, heç bir neçə gün çəkmədi, qızım qaşınmağa başladı. Həkimə apardım, bilmədi ki, bu qaşınma nədən ola bilər? Sonra bu cür su ilə yuyunduğunu deyəndə, həkim bu sudan nəinki istifadə etməyi, hətta onunla paltar yumağı da qadağan elədi".
Gəncə şəhər Gigiyena və Epidemiologiya Mərkəzinin direktoru Asim Kazımov həmin küçədə suyun analiz edildiyini, nəticədə onun içmək və istifadə üçün yararsız olduğunu təsdiqlədi. Bu isə o deməkdir ki, şəhərin bu qismində sakinlər qorxulu xəstəliklər qarşısında müdafiəsiz qalıblar.
Gəncə şəhər Su-Kanal SC baş mühəndisi Məhəmməd Hüseynov aprel ayında həmin küçədə çirkabın su xəttinə qarışdığı güman edilən hissədən su borusunu 15 metr kənara çəkərək, müəyyən təmir işləri aparıldığını dedi. Yeni su və kanalizasiya xətti çəkmək üçünsə hələlik vəsaitin olmadığını söylədi.
|
