Nuru Paşanın komandanlığı altında Qafqaz İslam Ordusunun Azərbaycana gəlişinin 91-ci ildönümü ilə bağlı dünən Gəncədə konfrans keçirilib. APA-nın qərb bürosunun məlumatına görə, konfrans Türkiyə səfirliyinin və Türkiyə Universitetləri Məzunları İctimai Birliyinin (TUMİB) təşkilatçılığı ilə baş tutub.
Türkiyə səfirliyinin tanıtma və mədəniyyət müşaviri Melda Araz, TUMİB sədri Çingiz Babayev, politoloq Musa Qasımlı və bir çox yerli ziyalıların da qatıldığı tədbir Gəncə şəhər mərkəzi meydanında Heydər Əliyevin abidəsinin ziyarəti ilə başlayıb. Sonra iştirakçılar Cavad xanın məqbərəsini, milli istiqlalımızın təməlinin qoyulduğu tarixi binanı, Nuru Paşanın oradakı iş otağını ziyarət ediblər.
Aqrar Universitetin akt zalında keçirilən konfransda çıxış edən Melda Araz 1918-ci ildə Türkiyənin Azərbaycana hərbi dəstəyini də, dünənki konfransı da Türkiyə-Azərbaycan qardaşlığının təbii tələbatı kimi dəyərləndirib. Politoloq Musa Qasımlı, Aqrar Universitetin tarix kafedrasının müəlliməsi Məleykə Əlizadə isə çıxışlarında o dövrün hadisələrinə bir daha qayıdaraq Nuru Paşa və onun komandanlığı altında Gəncəyə daxil olan ordunun Azərbaycanın sonrakı taleyində oynadığı roldan danışıblar.
Sonda "Space" telekanalının müxbiri Zakir Muradovun çəkdiyi, Nuru Paşanın komandanlığı altında Gəncədən Bakıya yürüş edən Azərbaycan-Türkiyə ordu birləşmələri üçün yazılmış marşın tarixçəsi barədə sənədli film nümayiş etdirilib. Marşın musiqisi mayestro Fikrət Əmirovun atası, tarzən Məşədi Cəmil Əmirova, sözləri isə bu mətni qələmə alarkən 16 yaşında olan Salman Əhmədliyə aiddir. Zakir Muradovun filmində marşı Salman Əhmədlinin oğlu Bəşir Əhmədov ifa edib.
|
