"Donuz qripi"nin dalğası planeti bürüyüb

Srağagün Avropada A (H1N1) virusuna yoluxmaya dair 1193 fakt qeydə alınıb. APA-nın məlumatına görə, dünən Portuqaliyada 380, Almaniyada 323, İtaliyada 258, Norveçdə 128 "donuz qripi"nə yoluxma halı aşkarlanıb. Digər 104 fakt isə digər 10 Avropa ölkəsinin ərazisində qeydə alınıb. Bu günədək Avropada ümumilikdə 47828 nəfər "donuz qripi"nə yoluxub. Bunlardan 16584 nəfəri Almaniyanın, 13095 nəfəri Böyük Britaniyanın, 2624 nəfəri Portuqaliyanın, 2058 nəfəri İtaliyanın, 1839 nəfəri Yunanıstanın payına düşür. Avropada bu təhlükəli virusa yoluxmuş şəxslərdən 111 nəfəri vəfat edib.

"Donuz qripi" kimi tanınan A/H1N1 virusu ilk dəfə olaraq donuz və insanda deyil, quşlarda qeydə alınıb. "Röyter" agentliyinin Çilinin Səhiyyə Nazirliyinə istinadən verdiyi məlumata görə, virus hind toyuğunda aşkarlanıb. Çilidə quşlar arasında "donuz qripi" virusunun aşkarlanması Ümumdünya Səhiyyə Təşkilatının narahatlığına səbəb olub. Mütəxəssislər indiyədək virusun yalnız donuzlar arasında yayıldığını, donuzlardan insana keçdiyini güman edirdilər. Lakin bu fakt virusun digər heyvanlara keçmə ehtimallarını doğruldur.

ÜST virusa yayılma sürətinə görə 6-cı (ən maksimal) təhlükəlilik həddi verib. Təşkilat "donuz qripi" ilə bağlı növbəti proqnozunu açıqlayıb. Məlumatda bildirilir ki, cənub yarımkürədə virusa yoluxma mövsümü sona çatmaq üzrədir. Şimal yarımkürəsində isə, əksinə, virusa yoluxma mövsümü sürətlənəcək. Proqnozlara görə, ikinci dalğa birincidən daha dəhşətli nəticələrlə yadda qalacaq. Virusun budəfəki qurbanları gənc və sağlıqlı insanlar da ola bilər.

REKLAM

Rəqəmlərə görə, hazırda 209 min 438 nəfər virusa yoluxub. Ölənlərin sayı isə 2 min 185-dir.

Kolumbiya prezidenti Alvaro Uribe də "donuz qripi"nə yoluxanlar sırasına daxil oldu. "Exo Moskvı" radiosunun verdiyi məlumata görə, həkimlər prezidentin səhhətini qənaətbəxş hesab edir. "Yeni qrip"ə qarşı yoxlamadan Cənubi Amerika ölkələrindən birinin prezidenti Uqo Çaves də keçib. Buna səbəb prezidentin Cənubi Amerika sammitində Alvare Uribe ilə ünsiyyətdə olmasıdır. Testlər prezidentdə qorxulu virus aşkar etməyib.

"Donuz qrip"inin əhatə dairəsi genişləndikcə bu sahədə aparılan tədqiqatlar da sürətlənir. Məsələn, məşhur Fransa virusoloqu, tibb sahəsində Nobel mükafatı laureatı Lük Montanye A/N1N1 virusuna qarşı vaksin istehsal olunana kimi qorunma məqsədilə tərkibində papayya olan qidalardan istifadəni məsləhət görür. Alimin fikrincə, bu, immun sistemini möhkəmləndirər.

Yunanlar "donuz qripi"ndən qorunmaq üsulu tapıblar. Yunan alimləri xalq təbabətindən istifadə etməyi məsləhət görürlər. Onlar antibiotik əvəzinə limon şirəsi ilə bal, soğanla sarımsaq istifadə etməyi məqsədəuyğun sayırlar. Müşahidələr göstərir ki, virus yay aylarında daha az yayılır.

Rusiyada isə virus əleyhinə vaksin sınaqdan keçirilib. Preparatın istehsalına oktyabrın əvvəlində başlanacağı gözlənir. Risk qrupuna daxil olan əhali adi qripə qarşı da peyvənd olunacaq. Ümumilikdə 40 milyon doza vaksin hazırlamaq nəzərdə tutulur. Rusiyada 27 milyon insan vaksinasiya olunmalıdır. Ölkənin baş sanitar həkimi Gennadi Onişşenko bildirir ki, vaksinlərin hər ikisini (həm adi qripə, həm də "donuz qripi"nə qarşı) öz üzərində sınayacaq.

Komidə qripə qarşı vaksinasiya tədbirləri keçirilir. Vaksinasiya məktəbəqədər və məktəb yaşlı uşaqlar arasında aparılacaq. Peyvəndləmə sentyabr ayında aparılacaq. Tibb və təhsil müəssisələrinin işçiləri, xroniki xəstələr də peyvənd olunacaq. Ümumilikdə respublikaya 169500 doza vaksin göndərilib. Növbəti dozalar sentyabr-oktyabr aylarında daxil olacaq. Bu tədbirlər dünyada yayılan "donuz qripi"ndən müdafiə məqsədilə keçirilir.

Oktyabr ayından etibarən Türkiyədə "donuz qripi" xəstəliyinə qarşı peyvəndləmə əməliyyatına start verilir. Bu barədə məlumatı yerli KİV-ə səhiyyə nazirinin müavini Turan Buzqan verib. Nazir müavini bildirib ki, ilkin mərhələdə peyvəndləmə prosesi 6-35 ay arasında olan uşaqlar, diabet, ürək və qan-damar xəstələri arasında həyata keçiriləcək. "Donuz qripi"nə qarşı peyvənd Türk Silahlı Qüvvələrində də aparılacaq. Virusa qarşı sifariş verilən peyvənd sentyabr ayında Türkiyəyə gətiriləcək.