Dünən "Doktrina" Jurnalistlərin Hərbi Araşdırmalar Mərkəzi Kütləvi İnformasiya Vasitələrinin İnkişafına Dövlət Dəstəyi Fondunun 2009-cu il üçün KİV-lərə maliyyə dəstəyi müsabiqəsinin nəticələri ilə bağlı apellyasiya şikayəti verib. "Ayna"ya verilən məlumata görə, fondun apellyasiya komissiyasına yazılan şikayət ərizəsində "Hərbi jurnalistikanın inkişafı" adlı layihəyə obyektiv münasibət göstərilmədiyi qeyd olunub: "Təqdim edilən layihədə nəzərdə tutulan addımlar bu günün tələblərinə çox cavab verir. "Doktrina" Mərkəzinin təqdim etdiyi layihə həm güc strukturları ilə mətbuat arasında münasibətlərin sağlam istiqamət almasına, həm də bununla da orduya ictimai nəzarətin mühüm qolu olan hərbi jurnalistikanın inkişafına istiqamətlənmişdi. Beləliklə, layihənin hərbi istiqamətli olduğunu nəzərə alaraq, Müdafiə Nazirliyindən fondun rəhbərliyinə təsir və ya təzyiq göstərilməsi ehtimalı var. Çünki Müdafiə Nazirliyinin təsir dairəsində olan bir sıra qəzetlərin layihəsi qalib olub".
"Doktrina" mərkəzi bəyan edir ki, ilk müsabiqənin bu şəkildə nəticələnməsi, bir çox ciddi layihələrin kənarda qalması KİV-in İnkişafına Dövlət Dəstəyi Fonduna olan etimadı minimuma endirib.
Fonddan verilən məlumata görə, etiraz məktublarına sentyabrın 5-dən sonra baxılacaq. Narazılarla layihələri qiymətləndirmiş ekspertlər arasında görüş gözlənilir.
|
