Cənubi Afrika Respublikasında keçiriləcək futbol üzrə 2010-cu il dünya çempionatının seçmə mərhələsi sona yaxınlaşmaqdadır. Bu gün və gələn həftənin çərşənbə günü seçmə mərhələ çərçivəsində Avropa zonası üzrə 46 oyun keçiriləcək. Bununla da dünya çempionatına vəsiqə qazanacaq ilk komandalar bəlli olacaq. Hələliksə, yalnız Hollandiya yığması mundialın həlledici mərhələsində oynamaq hüququ əldə edib.
4-cü qrupda yer alan millimiz Lənkəranda Finlandiya yığmasını qəbul edəcək. Bu qrupda yığmamızdan başqa Almaniya, Rusiya, Uels və Lixtenşteyn komandaları da mübarizə aparır. Berti Foqtsun başçılıq etdiyi yığmamız bu seçmə mərhələdə altı oyun keçirib. Futbolçularımız Finlandiya, Rusiya yığmalarına səfərdə, Almaniya və Uels millisinə isə Bakıda uduzublar. Millimiz yeganə xalını Lixtenşteyn yığması ilə Bakıda keçirdiyi oyunda qazanıb. Azərbaycan hazırda yalnız Lixtenşteyni qabaqlayaraq 1 xalla qrupda beşinci yerdədir. Komandamızın çıxış etdiyi qrupda Almaniya komandası 19 xalla birincidir. İkinci pillədə qərarlaşan Rusiya yığmasının 15 xalı var. Finlandiya 10 xalla üçüncü, Uels yığması isə 9 xalla dördüncü pillədə qərarlaşıb.
Xatırladaq ki, yığmamız bu seçmə mərhələdə Finlandiya yığmasına qarşı ilk matçını ötən il oktyabrın 11-də Helsinkidə keçirib. Həmin oyunda çox yaxşı təsir bağışlayan futbolçularımız qapımıza görüşün 62-ci dəqiqəsində təyin edilən 11 metrlik cərimə zərbəsi nəticəsində minimal hesabla uduzublar. O zaman Mikael Forsell fərqlənmişdi. Komandamız bu dəfə Lənkəranda həmin məğlubiyyətin əvəzini çıxmağa çalışacaq. "Bakı" və "Qarabağ"ın avrokuboklarda çıxışı yığma üzvlərində özünəinam hissini artırıb. Yığmamızın yaxşı nəticə göstərəcəyinə təsir edəcək digər müsbət bir amil isə lənkəranlı futbolsevərlərin komandamıza güclü dəstək verməsidir. Millimizin baş məşqçisi Berti Foqts Lənkəranda keçiriləcək oyunla bağlı yerli mətbuata bunları deyib: "Bizi Stüart Baksterin komandasına qarşı çətin oyun gözləyir. Finlandiya üzərində qələbə qazansaq, bu, sensasiya olacaq. Çünki skandinaviyalılar qrupda üçüncü yerdədilər".
Azərbaycan - Finlandiya matçı Bakı vaxtı ilə 20.00-da başlanacaq.
Bu gün seçmə mərhələ çərçivəsində bu qarşılaşmalar da baş tutacaq: Ukrayna - Andorra, Şotlandiya - Makedoniya, Rusiya - Lixtenşteyn, Ermənistan - Bosniya-Herseqovina, Moldova - Lüksemburq, Bolqarıstan - Çernoqoriya, Macarıstan - İsveç, Danimarka - Portuqaliya, İsrail - Latviya, Türkiyə - Estoniya, Gürcüstan - İtaliya, Kipr - İrlandiya, Xorvatiya - Belarus, Polşa - Şimali İrlandiya, Slovakiya - Çexiya, İsveçrə - Yunanıstan, Avstriya - Farer adaları, İslandiya - Norveç, Fransa - Rumıniya.
|
