1979-cu ilin fevral inqilabından sonra hakimiyyətə yenicə gəlmiş qüvvələr qoyduqları qayda-qanunları pozanları, müxalifəti zindanlarda məhkəməsiz edam edirdi. Onların edamına sərf edilmiş güllənin pulunu isə məhkumun ailəsindən alırdı. Məhbus qızlar həbsxana nəzarətçiləri tərəfindən siğə olunur, zorlanır, sonra edam olunurdu. Bu talesiz insanlar şəhərin "lənətlənmişlər" adlandırılan qəbristanlığında adsız, başdaşı qoyulmadan gizlicə basdırılırdı.
Otuz il öncə öldürülmüş həmin talesizlərin doğmaları və yaxınları bir neçə ay əvvəl həmin məzarlığa toplaşmışdılar. Bu insanlar öz yaxınlarının məzarlarının müəyyən edilməsini istəmişdilər. Təməlində zorakılıq və vəhşət dayanan bu hakimiyyətin polisləri bu istəyi, təbii ki, əngəllədi.
Prezident seçkisinin nəticələrinə etiraz edənlərin zindanlarda başına açılan müsibətlər təzə praktika deyil və 30 illik təcrübəyə əsaslanır. Son prezident seçkilərindən sonra zindanlarda işgəncələr altında həlak olmuş 44 nəfərin meyitinin gizli şəkildə basdırılması faktı ötən həftə öz təsdiqini tapdı və hadisə həm İranda, həm də dünyada böyük əks-səda doğurdu. Vahiməyə düşən Tehran "Behişti-Zəhra" qəbristanlığının baş direktoru Mahmud Rzaianı tutduğu vəzifədən azad etməyə tələsdi.
Kəhrizək adlı həbsxanada - "İran Quantanamosu"nda məhbusların işgəncəyə məruz qoyulması faktını da hakimiyyət əvvəlcə inkar edirdi. Amma sonra bu hadisə ayətulla Xamneyi səviyyəsində etiraf olundu. Şəkillər saytlarda yayıldıqdan sonra qarışıq və çaşqın bəyanatlar verməklə canını qurtarmağa çalışdı. Parlament araşdırma komissiyasının üzvü Həmidrza Katuzian deyib: "Son hadisələrdə həlak olanların kütləvi şəkildə gizlicə basdırılması məsələsini bəzi deputatlarla müzakirə etmişik". Deputat bu qəbristanlığın 302-ci bölümündə kimliyi müəyyənləşdirilməmiş meyitlərin basdırıldığını təsdiq edib. Deputat parlamentdəki açıqlamasında meyitlərin kimliyinin müəyyənləşdirilməsinin qanuni yolla gerçəkləşdirilməsini istəyib.
Ötən gün isə adıçəkilən qəbristanlıqda gizli basdırılanlardan birinin şəxsiyyəti məlum olub. Bu, Səidə Purağayidir.
"Mediaforum"un məlumatına görə, binanın damında "Allahu-Əkbər!" şüarı verərkən mülki geyimli şəxslər onu tutaraq, naməlum istiqamətə aparıblar. Adının açıqlanmasını istəməyən bir şəxs Səidənin ailəsinə deyib ki, qız zindanda islam rejimi məmurları tərəfindən dəfələrlə zorlandıqdan sonra cinayətin izləri itsin deyə, bədəninin dizdən yuxarı hissəsi yandırılaraq, qətlə yetirilib. Rejim məmurları ailəni hədələyərək, "Səidənin böyrək xəstəliyindən öldüyünü" demələrini tapşırıblar.
Bundan başqa Rza Əllaməzadənin İran zindanlarında qadın siyasi məhbusların zorlanmasına dair iki sənədli filmi - "İndi çox yorğunam" və "Bəli, halım yaxşıdır" yayılıb. Müsahibə əsasında hazırlanmış filmlər 1980-ci illərdə Tehranın "Evin" zindanında iki siyasi məhbus qadının çəkdiyi əzablardan bəhs edir. Filmləri Rza Əllaməzadə 4 il öncə Stokholmda çəksə də, onu İranda prezident seçkisinin rəsmi nəticələrinə etiraz edən və tutularaq zindanda zorlananlarla söhbət etdikdən sonra yaymaq qərarına gəldiyini söyləyib.
Son seçkilərdə prezidentliyə iddiaçılar isə onlarda zindanlarda işgəncə altında öldürülümüş azından 69 nəfərlik bir siyahı olduğunu bildirmişdilər.
