"Mənə daxil olan məlumatlara görə, bəzi rayonlarda yerli icra hakimiyyəti orqanları müəllimlərin əməkhaqqından bir faiz tutub, uşaq fondu yaradırlar. Bu addım tamamilə qanunsuzdur". APA-nın xəbərinə görə, bunu Azərbaycanın təhsil naziri Misir Mərdanov deyir. Nazir bildirib ki, kim bu addımları atırsa, qanun qarşısında məsuliyyət daşıyır.
M.Mərdanov bəzi rayonlarda məktəb direktorlarının, icra hakimiyyəti orqanlarının şagirdlər üçün məktəbli formaları satmaları barədə məlumatların olduğunu da deyib: "Bəyan edirəm ki, məktəbin, icra hakimiyyəti orqanının valideyn və şagirdin məktəbli forması almasına müdaxilə etməyə haqqı yoxdur".
M.Mərdanov bildirib ki, yeni dərs ilinə kimi 50-yə qədər yeni tikilmiş orta məktəb istifadəyə veriləcək. O, yeni dərs ilinə hazırlığa ötən dərs ilinin sonundan başlandığını, yeni məktəblərlə bərabər, digər məktəblərin əsaslı təmiri, onlara avadanlıqların verilməsi işinin də davam etdirildiyini və bunların həyata keçirilməsi üçün dövlət büdcəsindən 60 milyon manata yaxın vəsait ayrıldığını bildirib: "Bu il peşə təhsili ilə bağlı 8 fənn üzrə dərslik nəşr olunub. Bütövlükdə peşə təhsili sahəsində çox önəmli addım atmışıq. Bu vaxta qədər Azərbaycanda peşə məktəblərinin şagirdləri üçün bir dərslik də nəşr olunmamışdı. Bundan əlavə, üç məktəbdə pilot olaraq həndəsə və cəbr fənlərini inteqrativ surətdə birləşdirmişik və həmin məktəblərdə bir il müddətində sınaq keçirəcəyik".
Nazir yeni dərs ilinin sonunda 11-ci siniflərin buraxılış imtahanlarının yenə də mərkəzləşmiş qaydada olacağını deyir. Bundan əlavə, 9-cu siniflərdə də buraxılış imtahanları mərkəzləşmiş qaydada aparılacaq. Burada iki fənn - ana dili və riyaziyyatdan imtahanları test üsulu ilə aparmaq qərara alınmışdır.
M.Mərdanov rus və ingilis dillərinin tədrisinə xüsusi diqqət yetirildiyini, Bakının 7 məktəbində Britaniya Şurasının ("British Councill") dəstəyi ilə ingilis dili dərsinin tədris saatlarının iki dəfədən çox artırıldığını söyləyib. Bu ildən 50 məktəbdə rus dilinin intensiv olaraq xarici dil kimi öyrədilməsi layihəsi də həyata keçiriləcək.
Nazir bildirir ki, "Təhsilin əsasları" fənnini tədris edəcək müəllimlər üçün treninqlər başa çatıb. Dünən bu münasibətlə Azərbaycan Müəllimlər İnstitutundakı mərasimdə treninqləri başa vurmuş müəllimlərə sertifikatlar təqdim olunub. M.Mərdanov bildirib ki, 3 ali məktəbdə - Azərbaycan Müəllimlər İnstitutu, Azərbaycan Pedaqoji Universiteti və Gəncə Dövlət Universitetində eksperiment olaraq "Təhsilin əsasları" fənni tədris ediləcək: "Cəmiyyətdə belə fikir var ki, ali təhsili başa vuran gənclər bir sıra hallarda müəllim kimi işə başlamağa hazır olmurlar. Ona görə də biz gənclərin məktəb, təhsil siyasəti və təhsil sistemi ilə bağlı bilik və bacarıqlarını artırmağı vacib bilirik. Bundan sonra biz təkcə təhsil alanın deyil, təhsil verənin də biliyini qiymətləndirəcəyik".
|
