""Eurovision - 2009" yarışmasında erməni ifaçılarına səs göndərmiş Azərbaycan vətəndaşlarının guya Milli Təhlükəsizlik Nazirliyinə çağırılaraq sorğu-sual edilməsi barədə məlumatlar siyasi oyundur". APA-nın məlumatına görə, bunu Azərbaycanın gənclər və idman naziri Azad Rəhimov deyib. O bildirib ki, yarışmadan sonra Azərbaycanda heç kim hansısa idarəyə çağırılmayıb və heç kimə təzyiq göstərilməyib:
"Bəlli olur ki, ermənilərə səs göndərən 43 nəfərin içərisində Rövşən Nəsirlidən başqa heç kim MTN-də olmayıb. Mən inanmıram ki, MTN əməkdaşları əllərində 43 nəfərlik siyahı ilə gəzirlər. Rövşən Nəsirli isə vəkilsiz, bir zəng olan kimi qaçaraq MTN-ə gedib və onu orada sorğu-sual ediblər. Bu, tam şəkildə onun tərəfindən həyata keçirilən siyasi oyundur".
Nazir bildirib ki, MTN belə bir araşdırmaya başlasaydı, o zaman səs göndərənlərin ən azı yarısı sorğu-sual edilərdi: "Nəyə görə yalnız bir nəfər çağırılıb və bütün dünya da onun bu açıqlamasından sonra ayağa qalxıb".
Azad Rəhimovun sözlərinə görə, bu məsələlər ortaya çıxdıqdan sonra ermənilərin əlinə fürsət düşüb: "Azərbaycan üçüncü yerə çıxmışdı və ermənilər bunu həzm edə bilmirdilər. İndi səs-küy qaldırmaq üçün əllərinə imkan düşüb".
"Mən Qarabağ Azadlıq Təşkilatının mövqeyini başa düşürəm və bir insan kimi bu mövqeyi bölüşürəm". Bunu isə nazir Azərbaycan cüdoçularının Ermənistanda keçirilən Avropa çempionatına qatılmamaları ilə bağlı tələblərə münasibət bildirərkən deyib. Nazir bildirib ki, QAT rəhbərliyi onunla görüşə cəhd edərkən Bakıda olmayıb və buna görə də görüş baş tutmayıb: "Bu təşkilatın rəhbərliyi ilə görüşə hazıram. Amma burada dövlət siyasəti var və biz idmançılarımızı Ermənistana göndərməklə heç nə itirmirik. Əksinə, idmançılarımız orada iştirak edib qızıl medal qazanacaqlarsa, Ermənistanda Azərbaycanın bayrağı qaldırılacaqsa, himni səslənəcəksə, bu bizim üçün uğurdur. Digər tərəfdən, bu çempionat Ermənistanın tədbiri deyil, Avropa Cüdo Federasiyanın təşkil etdiyi bir tədbirdir".
Nazir rəhbərlik etdiyi qurumun 2009-cu ilin 8 ayı ərzində gənclər və idman sahəsində həyata keçirdiyi tədbirlərlə bağlı mətbuat konfransı keçirib. Nazir min nəfərə yaxın gəncin nazirliyin təşkil etdiyi yay düşərgələrində istirahət etdiyini, 150-yə qədər gəncin beynəlxalq tədbirlərdə iştirak etdiyini bildirib. O, 2007-ci ildə elan olunmuş QHT-lər üçün qrant layihəsi müsabiqəsində qalib gəlmiş 23 təşkilata 2009-cu ildə maliyyə ayrıldığını bildirib. Onlara 100-ə qədər layihənin daxil olduğunu və hazırda bu layihələrin ictimai şura tərəfindən qiymətləndirilmə prosesində olduğunu qeyd edib: "Bu ilin sonuna kimi bu layihələrin bir hissəsini maliyyələşdirəcəyik".
Azad Rəhimov Avropa Şurasının Bakıda Yay Məktəbi təşkil etdiyini, işsizliyin aradan qaldırılması üçün İqtisad Universiteti ilə birgə Karyera Mərkəzinin öz işini davam etdirdiyini və bu vaxta qədər 1300-ə qədər gəncin özünə iş tapdığını bildirib. Azad Rəhimov ilin sonuna kimi tələbə gənclərin ilk toplantısının keçiriləcəyini bildirib.
Nazir Azərbaycanda fizika, kimya və biologiya üzrə olimpiadanın keçiriləcəyini, burada 37 dövlətin iştirakının artıq təsdiq olunduğunu qeyd edib. Bundan əlavə MDB gənclər ili çərçivəsində bir sıra tədbirlər planlaşdırılır. Kuba, Misir və Küveytlə yaxın vaxtlarda gənclər və idman sahəsində əməkdaşlıq müqaviləsi də imzalanacaqdır.
|
