"Hüquq-mühafizə orqanları aprelin 30-da Dövlət Neft Akademiyasında günahsız insanların qəsdən öldürülməsi və həyatlarına sui-qəsd edilməsi faktı ilə əlaqədar başlanmış cinayət işi üzrə Rusiya, Gürcüstan və Ukrayna hüquq-mühafizə orqanları ilə əlaqəli şəkildə zəruri istintaq hərəkətləri və əməliyyat-axtarış tədbirlərini davam etdirir". Bunu "Mediaforum" saytına Baş Prokurorluğun mətbuat xidmətinin rəhbəri Eldar Sultanov bildirib.
Sultanov bildirib ki, Neft Akademiyasında cinayət törədən Fərda Qədirov əvvəllər Rusiya Federasiyası və Gürcüstanda yaşadığından əlaqələrinin müəyyənləşdirilməsi və iş üçün əhəmiyyət kəsb edən istintaq hərəkətlərinin aparılması məqsədilə istintaq qrupu üzvləri həmin ölkələrə ezam olunublar.
"Törətdikləri cinayət əməllərinə görə Cavidan Amirov, Nadir Əliyev, Ariz Qabulov və Nəcəf Süleymanovun CM-nin müvafiq maddələri ilə təqsirləndirilən şəxs qismində cəlb olunaraq barələrində məhkəmənin qərarı ilə həbs-qətimkan tədbiri seçildiyini" xatırladan mətbuat xidməti rəhbəri deyib:
- Hazırda cinayətin təşkilatçılarının, təhrikçilərinin, digər iştirakçılarının və törədilmə səbəblərinin, Fərda Qədirov və digərlərinin Bakı şəhərində yaşadığı müddətdə başqa cinayətlərdə iştirakının olub-olmadığı araşdırılır.
Cinayət işinin istintaqının gedişi barədə mütəmadi olaraq ictimaiyyətə məlumat verdiklərini vurğulayan Sultanovun sözlərinə görə, sonuncu açıqlamadan sonra istintaq orqanları xeyli iş görüb: "İctimaiyyətə məlumat veriləcək".
DİN və respublika Baş Prokurorluğu Dövlət Neft Akademiyasına silahlı basqın edərək 12 nəfəri öldürüb, 13 nəfəri yaralayıb özünə qəsd edən Fərda Qədirovun işi üzrə son birgə açıqlamanı iyunun 20-də yayıb.
Cinayət işi üzrə aparılan ibtidai istintaqın müddətinin artırılıb - artırılmadığına gəlincə, Sultanov bildirib ki, qanunvericiliyə görə Neft Akademiyasında törədilən cinayət xüsusilə ağır cinayət hesab olunduğundan onun ibtidai istintaqı dörd ay müddətində başa çatmalıdır: "Lakin cinayət işinin mürəkkəbliyi ilə əlaqədar həmin müddət daha dörd ay uzadıla bilər".
|
