Ötən gün Çempionlar Liqası (ÇL) qrup mərhələsinin püşkatması keçirilib. Bu il qrup mərhələsində 18 ölkənin klubları mübarizə aparacaq. 32 iştirakçıdan 8-i Çempionlar Liqası qrup turnirində ilk dəfə çıxış edəcək. Almaniya çempionu "Volfsburq", o cümlədən "Rubin", "Alkmaar", "Debretsen", "Apoel", "Yunirea", "Sürix", "Standard" da ÇL qrup mərhələsinin debütantlarıdır.
Çempionlar Liqasının qalibi "Barselona" titulunu qorumaq üçün qrupda İtaliya və iki slavyan ölkəsi təmsilçisi ilə qarşılaşacaq. Odur ki, futbolsevərlərin baxımlı futbol görəcəkləri şübhə doğurmur. Bu qrupda intriqa doğuracaq bir məqam da "Barselona" ilə "İnter" arasında futbolçu mübadiləsindən qaynaqlanır. Belə ki, İspaniya klubu Samuel Etonu İtaliya komandasına verib, əvəzində Zlatan İbrahimoviçi alıb. İndi bu iki çox güclü hücumçu keçmiş klublarına qarşı oynayacaqlar. Rusiya və Ukrayna çempionlarının da qarşıdurması qızğın mübarizə vəd edir.
Püşkatma Türkiyə çempionu "Beşiktaş"a İngiltərənin güclü "Mançester Yunanayted" klubunu rəqib seçib. Ötən mövsüm gözlənilmədən Almaniya çempionu olan "Volfsburq"da "Beşiktaş"ın rəqiblərindən biridir.
Qrup mərhələsinin matçları sentyabrın 15-də başlanır. Qruplarda birinci və ikinci yeri tutan komandalar gələn ilin yazında keçiriləcək pley-off mərhələsinə vəsiqə qazanacaqlar. Qruplarda üçüncü yeri tutan komandalar mübarizəni Avropa Liqasının 1/16 finalında davam etdirəcəklər. Çempionlar Liqasının finalı 2010-cu il mayın 22-də Madridin "Santyaqo Bernabeu" stadionunda təşkil olunacaq.
A" qrupu - "Bavariya" (Almaniya), "Yuventus" (İtaliya), "Bordo" (Fransa) "Makkabi" (İsrail); "B" qrupu - "Mançester Yunayted" (İngiltərə), MOİK (Rusiya), "Beşiktaş" (Türkiyə), "Volfsburq" (Almaniya); "C" qrupu - "Milan" (İtaliya), "Real" (Madrid, İspaniya), "Marsel" (Fransa), "Sürix" (İsveçrə); "D" qrupu - "Çelsi" (İngiltərə), "Portu" (Portuqaliya), "Atletiko" (İspaniya), "Apoel" (Kipr); "E" qrupu - "Liverpul" (İngiltərə), "Lion" (Fransa), "Fiorentina" (İtaliya), "Debretsen" (Macarıstan); "F" qrupu - "Barselona" (İspaniya), "İnter" (İtaliya), "Dinamo" (Kiyev, Ukrayna), "Rubin" (Rusiya); "G" qrupu - "Sevilya" (İspaniya), "Reyncers" (Şotlandiya), "Ştutqart" (Almaniya), "Yunirea" (Rumıniya); "H" qrupu - "Arsenal" (İngiltərə). "Alkmaar" (Hollandiya), "Olimpiakos" (Yunanıstan), "Standard" (Belçika).
|
