Adı məhkəmə qalmaqalında hallanan Rəqsanə haqqında müxtəlif fikirlər səslənməkdədir. Onun haqqında avtomobilinin və evinin əlindən alındığını söyləyənlər sənətçinin əslində müflis vəziyyətə düşdüyünü iddia edirlər. Lakin Rəqsanə bu fikirləri yalana çıxarır. Bildirir ki, hazırda məhkəmə işi davam edir. Lakin bu işlə özü yox, vəkili məşğul olur. Xatırladaq ki, məhkəmə işi onun vaxtilə kreditə pul götürdüyü hansısa şirkət nümayəndələri arasında davam edir. Bu barədə hər hansı fikir bildirmək istəməyən sənətçi yalnız yaradıcılığı barədə danışmaq istədiyini söylədi: "Artıq adımın hansısa ucuz qalmaqallarda hallanmasına icazə verməyəcəm. Bu mənim sənət devizimdir. Yalnız yaradıcılığa köklənəcək və kimsə mənimlə qalmaqal yaratmaq istərsə, ona əvvəlki Rəqsanə olmadığımı başa salacağam".
Artıq öz yaradıcılıq strategiyasını müəyyənləşdirən müğənni ciddi planlar üzərində çalışdığından danışdı. Bildirdi ki, hazırda bir sıra retro mahnılar hazırlayır. Bunların bir qismi lentə yazılıb. Digərləri isə hazırlıq prosesindədir. Söhbətdən bəlli oldu ki, Ağadadaş Ağayevin repertuarından olan bir mahnını ifa edib. Bundan öncə isə həmkarından razılıq almağı unutmayıb. Bu və digər mahnıların onun yaradıcılıq həyatında mühüm rol oynayacağını əminliklə söylədi: "Bir müddət əvvəl Azərbaycanın Xalq artisti Zeynəb Xanlarovanın repertuarından silsilə mahnılar oxuyacağım barədə xəbər vermişdim. Sənətkarla görüşümüzdən sonra onunla münasibətlər gözlədiyimdən də yaxın oldu. Zeynəb xanım bildirdi ki, arxivində hələ heç yanda səsləndirilməyən öz bəstələri durur. O, həmin mahnıları mənim ifamda eşitmək istədiyini bildirdi və söz verdi ki, onlardan bir neçəsini mənə təqdim edəcək. İnanıram ki, yeni repertuarımda hazırlıq işlərim başa çatandan sonra sənət aləminə yeni imza atmış olacam".
|
