Məleykə Əsədova: "Tək qalmaq çətindir"

"İtgin gəlin" serialından sonra parlayan xalq artisti Məleykə Əsədova sənətdə özünü bəxti gətirənlərdən hesab edir. Şəxsi həyatda isə özünü o qədər də şanslı hesab etmir. Səhnədə ona rolları, həyatda isə yeganə övladı ruh verir:

- Mən bəxti gətirən aktrisayam. Aktrisanın istedadı olmasa, ona kömək etməyin də mənası olmaz. Lütfi Məmmədbəyov istedadımı görməsəydi, məni seriallara, tamaşalara dəvət etməzdi. Rollarımın hamısını yaşayıram. Mən qiraət, nitq mədəniyyəti, diksiya mükəmməlliyinə görə Mikayıl Mirzəyə borcluyam. Onun da üzərimdə əməyi az olmayıb. Xaraktercə elə insanam ki, yaxşılıq itirmirəm. Mənə hörmət edən insanlara həmişə qarşılıqlı hörmət göstərirəm.

- Aktrisa olandan sonra bir çox qohumlar sizdən üz döndərib. Bəs tanınandan sonra necə, münasibət dəyişdimi?

- Təbii. O kəslər ki əvvəllər toylarda oxumağıma, səhnəyə çıxmağıma pis baxır, deyirdilər ki, nəslimizə yaraşmır, həmin insanlar sonradan özlərini mənim ən yaxın qohumlarım kimi təqdim etməyə başladılar. Hətta qohumlarımın sayı çoxaldı.

İnsan ilk növbədə özünə inanmalıdır. Özümə inanmasaydım, bu gün heç nə əldə etməzdim. Başqa bir məsələdir ki, alın yazısının, taleyin də rolu var.

REKLAM

Əvvəllər alın yazısına inanmırdım. Lakin bu gün əksinə düşünürəm. Teatrdakı uğurlarıma gəlincə, onları asanlıqla əldə etməmişəm. Hər rol üzərində aylarla çalışmışam.

- Həm teatrda çalışmaq, həm də övlad qayğısı. Çətin deyil ki?

- Əvvəllər yalnız səhnəyə bağlı idim. Bu gün balaca qızım mənim üçün həyat deməkdir. Boş vaxtlarımı yalnız qızımla bölüşürəm. Onu savadlı bir insan kimi görməyi arzu edirəm.

- Aktrisamı?

- İstəməzdim aktrisa olsun. Çünki bu sənət çox çətindir. Özüm bu çətinlikləri keçdiyim üçün belə fikirdəyəm.

- Bəs ailəniz nə səbəbdən dağıldı?

- Yalan üzündən. Ancaq ağ yalan danışılanda bağışlamağı bacarmıram. Ailə müqəddəsdir, heç kim istəməz ki, ailəsi dağılsın. Ancaq həyat öz diktəsini yeridir, yəqin, bu da alın yazısı imiş.

Tək qalmaq çətindir. Əgər qızım olmasaydı, bəlkə də ayaq üstə durmağa çətinlik çəkərdim. Bir qadın, bir ana üçün tək olmaq həm məsuliyyətli, həm də ağırdır. Bilirəm ki, ağır bir yük altındayam. Heç bir qadına tənhalıq arzulamıram. Qadın sevdikcə, sevildikcə gəncləşir, gözəlləşir.

- Bəziləri sizi özündənrazı kimi tanıyırlar. Bu belədirmi?

- Olanı deməliyəmsə - həyatda çox sadəyəm. Ən azı bunu ətrafımdakı insanlar, qohumlar, yaxınlar bilir. Efirdə bəlkə də elə görünürəm.

- Mətbəxdə həvəslə çalışmağa gəldikdə?

- Düzünü deyim ki, mətbəxlə o qədər də aram yoxdur. Dadlı yeməkləri isə sevirəm. Xüsusilə də balıq yeməklərini. Axı balıqçı qızı olmuşam.

- Haqqınızda nələrsə söylənir. Amma siz hər variantda susursunuz...

- Bu kimi söhbətləri mənəviyyatsız kəslər yayır. Tanınmış insanlar barədə çox adam çox söz danışar. Əgər hər sözə cavab verəsi olsam, gərək bütün işlərim ikinci plana keçsin.