Əvvəllər hər hansı sənətçinin adı çəkiləndə gözümüzdə onun özünəməxsus libasları və saç düzümü canlanardı. İndi xarici görünüş o qədər sürətlə dəyişir ki, imic anlayışına düzəliş vermək lazım gəlir. Bəs, sənətçilər hansı modelyerlərlə çalışır? Onlar üçün modelyerlərlə işləmək daha sərfəlidir, yoxsa hazır geyim almaq? Kiçik bir sorğudan bəlli oldu ki, Röya xüsusi stilistlə çalışmayan sənətçidir. Yalnız konsert və çəkilişlər zamanı bu işin peşəkarları ilə işləyir:

"Bu günə kimi konsertlərdə modelyer əməyindən bəhrələnmişəm. Əksər hallarda isə hazır geyimlər alıram. Elə vaxt olub ki, konsertə sadə paltarda çıxmışam. Çünki mən tamaşaçını geyimimlə deyil, sənətimlə maraqlandırmaq istəyirəm".

Stilist Syama ilə çalışan Xumar Qədimova isə imicini ifa tərzi ilə uyğunlaşdırdığını bildirdi:

- Mən dəblə geyinməyin tərəfdarı deyiləm, əsas odur ki, özünə yaraşanı tapasan. Moda ilə geyinməyi də xoşlayıram, amma bunu mən geyinirəmsə, öz fikirlərim də olmalıdır. Əks halda özümü narahat hiss edirəm və həmin geyimdən bir və ya iki dəfə istifadə edəndən sonra qarderobda saxlayıram. İradə İbrahimova 10 illik yaradıcılığı dövründə yalnız stilist Syamanın əməyindən bəhrələndiyini deyir. Bunu isə adi günlərdə deyil, klip çəkilişlərində göstərir. Digər geyimlərini isə özü seçir. Deyir ki, qarderobunu təzələmək üçün onun başqa ölkələrə səfərə çıxdığı günlər də olub. Eyni zamanda paytaxt mağazalarına üz tutmaqla zövqünü təzələdiyini deyir.

Müğənni Xuraman Şuşalı xüsusi imicmeykerinin olmadığını söylədi. Səfərdə olarkən qarderobunu hazır geyimlərlə zənginləşdirdiyini bildirdi.

REKLAM

---

---

Adi günlərdə isə o, paytaxtdakı geyim mağazalarına üz tutur.

İmici bir çoxları tərəfindən birmənalı qarşılanmayan Nazpəri Dostəliyeva bir müddət stilist Syama ilə çalışsa da, hazırda stilini özü müəyyənləşdirir və xarici ölkələrdən alınan geyimlərə üstünlük verir. İmicinin birmənalı qarşılanmaması fikri ilə razılaşmayan Nazpəri xanım dedi ki, onun imicini çoxları bəyənir:

- Bir çox qadınlar gözəllik salonuna gedir və ustadan xahiş edir ki, onu Nazpəri xanıma oxşatsın. Bu mənim üçün fəxrdir. Bu imici heç kəs yox, özüm seçmişəm. Əməkdar artist Sevda Ələkbərzadənin fikrincə, hərə öz zövqünə görə geyinməlidir: "Səhnəyə təzə çıxan müğənnilər həm görünüş, həm də rəqsləri ilə özlərini xaricilərə oxşadırlar. Səhnə görünüşüm mənə, ifa tərzimə mütləq yaraşmalıdır. Hazırda heç bir stilistlə çalışmıram. Öz zövqümə inanıram". Xalq artisti Firəngiz Mütəllimova hesab edir ki, imic təkcə geyimlə ölçülmür, yaradıcılığa da aid ola bilər:

- Məsələn, mənim imicim "Gülnar"dır. Əvvəllər lirik obrazlar oynayırdımsa, indi komik rollar oynayıram. Yəqin, bu da imicin dəyişməsidir. Aktrisa modelyerlə çalışmağa da bir o qədər üstünlük vermir. Rolları kimi seçdiyi geyimlərinin də ona yaraşdığını deyir. Bir zamanlar bir çox sənət adamının vizaj işlərini üzərinə götürən Azərbaycan Moda Assosiasiyasının vizaj departamentinin sədri Fatma Əkbərova hazırda imicmeykerlik məktəbi yaratmaqla bağlı işlər görüldüyünü dedi. İndikilərin imicindən razı qalmayan Fatma Əkbərova Röyanın stilini bəyəndiyini söylədi. Röya istisna olmaqla, digər müğənnilərin zövqsüz geyindiklərini deyən vizajist "zövqsüzlər" sırasına Aygün Kazımova və Nazpəri Dostəliyevanı da aid edir. Vizajist Ülviyyə xanım isə gənc müğənnilərin yaşlarına uyğun geyinməkdiklərindən gileyləndi: "Moskvada ulduzlar səhnəyə necə çıxırlar? Geyim çox cəlbedici olanda saç düzümü, makiyaj sadə olur. Tanınmış ölkələrin çoxunda imicmeykerlik məktəbi var. Bizdə həmin məktəbin yaranması üçün mühit onlardakı səviyyəyə çatmayıb". Sənətçi səhnəyə çıxanda işıqların, həmçinin efirdə görünüşün nəzərə alınmadığını deyən gənc modelyer Günel Vidadinin fikrincə, bu gün hər dükan satıcısı, alverçi özünü "stilist" sayır. Modelyer sənətçilərin özlərini xarici ulduzlara oxşatmalarına da münasibət bildirdi: "Elə müğənnilər var fikirləşirlər ki, xarici müğənniyə oxşasalar, daha məşhur olarlar. Bu da düşüncə tərzinin olmamasından irəli gəlir. Düşünürlər ki, xaricilər bizdən ağıllıdır. Amma bizim elə gözəl milli xüsusiyyətlərimiz, geyimlərimiz var ki, əksər hallarda əcnəbilər bu görüntüyə həsəd aparırlar". Deyilənə görə, dünyada ən güclü imicmeyker məktəbi Hollivudda, ən yaxşı saç ustaları Parisdə, ən yaxşı vizajistlər Milandadır. Bizimkilər də öz imiclərini bu deyim üzərində qurmaqla, Avropanı yamsılamağa çalışırlar. Ona görə ki, dəbi Avropa diktə edir. Sadəcə, ulduzlar effekt və defektlərini yaxşı bilməlidir. Bundan başqa, insanın öz görünüşündə estetika olmalıdır. Bir də ən başlıcası - zövqün olmasıdır. Geyimin də gözəlliyi açıq-saçıqlıqda deyil, yaraşmasındadır.