"Son vaxtlar bir sıra elektron kütləvi informasiya vasitələrində Azərbaycanın "Eurovision-2009" mahnı müsabiqəsində iştirakı ilə bağlı məsələ gündəmə gətirilir. Qeyd etmək lazımdır ki, bu müsabiqədə Azərbaycan öz qonşularını xeyli qabaqlayaraq ön sıralarda layiqli yerini tutub. Bir sıra elektron kütləvi informasiya vasitələrində Azərbaycanın, həmçinin ölkənin hüquq-mühafizə orqanlarının ünvanına əsası olmayan ittihamlar səslənməkdədir. Azərbaycanda "Eurovision" layihəsinə dövlət tərəfindən rəsmi olaraq dəstək verən bir nazirliyin rəhbəri olaraq yaranmış vəziyyəti araşdırmaq və məsələ ilə bağlı müvafiq fikir bildirmək əzmindəyəm". Bunu APA-ya müsahibəsində Azərbaycanın gənclər və idman naziri Azad Rəhimov deyib.
"Məsələni araşdırarkən müəyyən olunub ki, sözügedən müsabiqə zamanı Azərbaycandan Ermənistan iştirakçısına səs vermiş şəxslərin sayı və siyahısı nə müsabiqə zamanı, nə də müsabiqədən sonra Azərbaycan tərəfində mövcud olmayıb. Belə olduğu halda, məsələdə adı hallanan Rövşən Nəsirovun belə bir siyahını görməsi ciddi şübhə doğurur. Digər şübhə doğuran məqam ondan ibarətdir ki, nəyə görə səs verənlərdən məhz və yalnız Rövşən Nəsirov MTN-ə çağırılıb. Deməli, adıçəkilən "43 nəfərin siyahısı" bəzi səriştəsiz jurnalistlərin təxəyyülündən başqa bir şey deyildir".
Azad Rəhimov bəzi kütləvi informasiya vasitələrinin bu mövzunu qəsdən siyasiləşdirməyə çalışdığını bildirib: "Bizi məyus edən məqam odur ki, "Azadlıq" radiosunun Azərbaycan xidməti kimi bir sıra kütləvi informasiya vasitələri birtərəfli informasiya siyasəti yürüdərək, məsələyə siyasi don geyindirmə və bununla da mövzunu siyasiləşdirməyə çalışırlar. Son vaxtlar Azərbaycana münasibətdə, xüsusilə ərazi bütövlüyü məsələsində dəfələrlə "ikili standartlar" mövqeyindən yanaşan "Azadlıq" radiosunun belə addımı ikrah hissi doğurur. Mən kütləvi informasiya vasitələrini məsələni siyasiləşdirməməyə, mövzunu daha dərindən araşdırmağa, maraqlı olan bütün tərəflərin fikrini işıqlandırmağa və ədalətli mövqe ortaya qoymağa çağırıram", - deyə nazir vurğulayıb.
|
