Azərbaycan Silahlı Qüvvələrinin maddi təchizatı - konkret olaraq ərzaq, geyim, məvacib təminatı üçün ayrılmalar hərbi büdcə artımına mütənasib deyil. Bunu "Ayna"ya açıqlamasında Hərbyönümlü QHT-lər Koalisiyasının koordinatoru, "Ehtiyatda və İstefada olan Zabitlər" İctimai Birliyinin sədri, ehtiyatda olan polkovnik-leytenant Yaşar Cəfərli bildirib.
Yaşar Cəfərli Azərbaycan Silahlı Qüvvələrinin maddi və sosial təminatını gücləndirməyi zəruri hesab edir. "Hərbi qulluqçuların mənzil problemi heç kimin yadına düşmür. Ordu günü gözlənən məvacib və pensiya artımı da baş vermədi. İlin sonunadək hər hansı bir dəyişikliyin baş verməsi inandırıcı deyil" - bunu söyləyən ekspert məvacib və pensiya artımının hərbi büdcənin artımına mütənasib olmasını zəruri sayır.
Ekspertlərin hesablamalarına görə, son 6 ildə Azərbaycanın hərbi büdcəsi təxminən 10 dəfə artırılıb. Amma bu zaman hərbi qulluqçuların məvacibləri isə 6-8 dəfə artırılıb.
Yaşar Cəfərli Azərbaycanın müdafiə xərclərinin artımının əsas səbəbi kimi dövlət büdcəsinin artmasını göstərir. "Mən bu artımı "kəskin artım" adlandırmazdım. Ümumiyyətlə, hesab edirəm ki, bəlli səbəblərdən müdafiə xərclərimiz dövlət büdcəsinin 14 faizi ilə kifayətlənməməlidir. "Zənnimcə, ordumuzun büdcəsi Gürcüstan ordusunun büdcəsindən (təqribən 1 milyard dollar) elə də çox deyil. Şəxsi heyətin sayına görə isə onlar bizdən 2-3 dəfə geridə qalırlar. 08.08.2008 tarixi çox şeyə aydınlıq gətirdi. Ona görə də arxayınlaşmamalıyıq", - deyə o bildirdi.
Yaşar Cəfərli bildirdi ki, müdafiəyə ayrılmış vəsaitdən düzgün istifadə olunmasına, mənimsənilməyəcəyinə zəmanət verən müvafiq mexanizmlər olmalıdır.
Bir sıra məlumatlara görə, NATO standartlarına keçid çərçivəsində Azərbaycan Silahlı Qüvvələrinin şəxsi heyətində ixtisarların zəruriliyi ortaya çıxıb. Amma Yaşar Cəfərli bunu istisna edir: "Mövcud şəraitdə şəxsi heyətin ixtisarı mümkün deyil. Əksinə, polis orqanları hesabına ordunun şəxsi heyətinin sayını artırmaq lazımdır. Unutmamalıyıq ki, döyüş əməliyyatları hər zaman bərpa oluna bilər".
Ekspertin fikrincə, Azərbaycana ayrılmış kvotalar silah və hərbi texnikanın sayını artırmağa imkan verir. "Yəni silah və hərbi texnika alışı kifayət qədər əsaslıdır. Amma alınan silah və hərbi texnikanın keyfiyyəti barədə bir söz demək çətindir", - deyə o bildirdi.
Yaşar Cəfərli bildirdi ki, zamana və büdcə artımına görə müqayisəyə gəldikdə, Azərbaycan ordusunda maddi-texniki təminat, təchizat, maddi-texniki bazanın inkişafı, kadr hazırlığı, mərkəzləşdirmə, idarəetmə, səfərbərlik, çağırış, planlaşdırma, sənədləşdirmə və s. sahələrdə, əlbəttə, inkişaf var. "Amma elə "əmma"lar var ki, bütün bu inkişafın bəhrəsini görməyə imkan vermir", - ekspertin fikrincə, cəmiyyətdə Silahlı Qüvələrdə xidmət peşəsinin nüfuzu nəzərəçarpacaq dərəcədə geriləyib və bu proses sürətlə davam edir: "Bu məsələ qeyd etdiyim əmmalardan biridir".
|
