Sənətini Türkiyə şou-biznesində sərgiləyən Yeganə Mürsəlovanın türk həmkarı Doğuşla birgə ifa etdiyi "Sanamı evet" mahnısının plagiat olduğu xəbərləri ağızdan-ağıza dolaşır. İddialara görə, duet ortaqları məşhur türk sənətçisi və teleaparıcısı Seda Sayanın repertuarında illər öncə hitə çevrilmiş "Kıskancım" mahnısının yadda qalan notlarından yararlanaraq, mahnının nəqəratındankı bəzi hissələri öz duetlərində istifadə ediblər. Yayılan xəbərlərə münasibət bildirən Yeganə xanım onu plagiatlıqda təqsirləndirənlərə belə cavab verdi:

- Hamıya bəllidir ki, musiqidə cəmi yeddi not var. Melodiyanın bir-birinə bənzəməsi normaldır. Çünki qeyd etdiyim kimi, musiqi yazanlar 7 notun üzərində işləyirlər. Bəzən bir musiqi insana hansısa mahnını xatırladır. Lakin diqqət yetirəndə fərqi hiss etmək olur. Sözügedən iki mahnıya gəlincə, bunların arasında, ümumiyyətlə, bənzərlik görmürəm. Bu mənim subyektiv fikrimdir. Lakin bəzi insanlar bunun əksini deyir. Xatırlayırsınızsa, "Sanamı evet"i Doğuşla ilk dəfə məhz Seda Sayanın aparıcısı olduğu və Türkiyənin "Kanal D" telekanalında yayımlanan "Sabahların sultanı" proqramında ifa etmişdik. Əgər mahnı həqiqətən də plagiat olsaydı, ona musiqi həyatı verən Doğuş istəməzdi ki, bəstəsi ilk dəfə Seda Sayanın proqramında səslənsin. Çünki Seda Sayan canlı efirdən etirazını bildirərdi. Doğuş bilərəkdən tənqid olunmasını istəməzdi. Lakin mahnını eşidəndən sonra Seda xanım duetimizi çox bəyəndiyini söyləməklə yanaşı, xeyir-duasını da bildirmişdi.

REKLAM

---

---

İstəyirəm ki, söylədiyim bu fikirlər əsassız söz yayanları susdurmaq üçün bir mesaj olsun. Eyni zamanda, söhbətə nöqtə qoyulsun. Çünki nə Doğuş, nə də mən gündəmdə yersiz fikirlərlə qalmaq istəmirik.

Yeganə Mürsəlova deyir ki, onun Azərbaycana sonuncu səfərində uğurları ilə barışmayan həmkarlarının qısqanclığını açıq şəkildə hiss edib. Bundan məyus olan sənətçi paxıl insanlara ürək qızdıra bilmədiyini söylədi:

- Bəziləri mənim zirvəyə qalxarkən hansı əziyyətlər çəkdiyimi görmək istəmirlər. Mənim uğurlarım onları çox narahat edir. Əslində, onların keçirdiyi hissləri anlaya bilirəm. Çünki bu gün barmaqla sayıla biləcək sənət adamları var ki, türk şou-biznesinə ayaq aça bilir. Onlardan biri də mənəm. Bu, böyük bir uğurdur. Çünki bu qədər çoxluğun arasında tanınmaq və gündəmdə qala bilmək çətin prosesdir. Hərdən məndən bunun sirrini öyrənməyə çalışırlar. Mən hər bir şeyin göz önündə olduğunu deyirəm. Mənim sənətdə bir strategiyam var - düz yolla addımlamaq. Əgər vaxtilə qalmaqallar burulğanına düşüb, oradan böyük səhnəyə boylanmaq iddiasına düşsəydim, ulduzum tez sönərdi. Lakin mən ağılla addımlamağa başladım. Qarşıma məqsəd qoydum, düşündüm ki, mənim üçün nağıla bənzəyən arzularımı gerçəkləşdirməliyəm. İllərlə əziyyət çəkdim. Çalışıb, istəyimə nail oldum.