"7-17" müsabiqəsinin qalibi kimi tanınan müğənni İradə İbrahimova bu il yaradıcılığının 10 illiyini qeyd edəcək. Ailəsi ilə birlikdə Bodrumda dincələn müğənni sentyabrın ilk günləri Bakıya səfər etməyi düşünür.
Müğənninin prodüserinin məlumatına görə, İradə İbrahimova ötən gün ailə üzvləri ilə birlikdə İstanbuldan Bodruma gedib. Ayın sonuna kimi orada qalmağı düşünən müğənni daha sonra klip çəkilişi üçün Bakıya üz tutacaq. Minayə xanımın mahnısı olan "Nigaranam, gəl"in ekran həllində iştirak edəcək müğənni, eyni zamanda, disk hazırlıqları ilə də məşğul olacaq. Prodüserin məlumatına görə, klip üçün ssenari artıq yazılıb. Çəkilişlərdə istifadə ediləcək geyimlər də tikilib. Stilist Syamanın məhsulu olan paltarlar klipin ssenarisinə uyğunlaşdırılıb.
Sənətçinin köməkçisi qeyd etdi ki, ötən aydan başlayan albom hazırlıqları sürətlə davam edir. Nəfis tərtibatla işıq üzü görəcək albom İradə xanımın yaradıcılığının 10 illiyi ərəfəsində təqdim ediləcək:
- İradə xanımın sənətə gəlişi "7-17" müsabiqəsindən başlayıb. O vaxt onun valideyləri istəməyiblər ki, qızları müğənni olsun. Bir çox tərəddüdlərdən və böyük sənətkarlardan dəstək görəndən sonra valideynləri onun müğənni kimi yetişməsinə razılıq veriblər. İradə xanım o vaxtlar jurnalistika fakültəsində təhsil aldığından musiqini özünə ikinci ixtisas kimi seçdi. Bu il Azərbaycan Milli Konservatoriyasının xanəndəlik fakültəsinin məzunu oldu.
|
