Bir neçə il əvvəl Bakıda keçirilən "Sinq your sonq" müsabiqəsinin qalibi olan gənc müğənni Sima Qasımova Türkiyədə keçirilən "Popstar Alaturka" mahnı müsabiqəsinə seçilib. Sənətçinin bildirdiyinə görə, müsabiqənin ilk canlı efiri bu həftəsonu Türkiyənin Fox.TV kanalında olacaq. Bir həftə öncə Türkiyəyə səfər edən və müsabiqənin şərtləri ilə yaxından tanış olan sənətçi eyni zamanda mahnı seçimində iştirak edib.
Onunla apardığımız telefon bağlantısından bəlli oldu ki, iştirakçıların mahnı seçimi müsabiqənin şərtlərinə uyğun aparılır. Azərbaycanlı təmsilçinin payına "Ah İstanbul" mahnısı düşüb. Onun sözlərinə görə, iştirakçılara hər həftə bir mahnı üslubunda oxumaq imkanı veriləcək. O, bunların birində Azərbaycan mahnısının olacağını istisna etmədi.
Müsabiqəyə qatılmağı barədə danışan Sima Qasımova bunları qeyd etdi:
- Mənə həmin müsabiqəyə video görüntülərin göndərilməsi barədə gec məlumat verilib. Mən burada aparılan seçim kampaniyasına yalnız səs yazılarımı təqdim etmişdim. Həmin yazılarla tanış olan Bülent Ərsoy tərəddüdlə mənim müsabiqəyə buraxılmağımı bildirib. Əks təqdirdə isə Azərbaycandan burada iştirakçının olmayacağını deyib. Onun fikri ilə razılaşan təşkilatçılar sonuncu gündə mənim namizədliyimi qəbul ediblər. Artıq məşqlər davam edir və mən müsabiqədə ilk ifamı təqdim edəcəm.
Sima Qasımovanın sözlərinə görə, ötən il eyniadlı müsabiqədə təmsil olunan münsiflər heyətinin tərkibində dəyişiklik aparılıb. Belə ki, müğənni Ebru Gündeşlə Orxan Gəncəbayı Gülbən Ərgən və teatr sənətçisi Metin Akpınar əvəz ediblər. Bülent Ərsoyla Arman Çağlayan isə yenidən münsiflər kürsüsündə əyləşəcəklər.
|
