Röya ilin sonuna kimi konsert rekordunu təzələyəcək. Onun budəfəki konsertinin 10 gün davam edəcəyi deyilir. Əvvəlcə sentyabrda çıxış edəcəyini söyləyən müğənni, daha sonra oktyabr ayını seçib. Onun çıxışı Opera və Balet Teatrında keçiriləcək. Konsert bir çox özəllikləri ilə yadda qalacaq.

Müğənninin mətbuat katibinin bildirdiyinə görə, oktyabrın ilk ongünlüyünü əhatə edəcək konsertdə məşhur Alla Puqaçovanın da çıxışı nəzərdə tutulur. Xatırladaq ki, oktyabrın 4-də Alla Puqaçovanın Bakıda konsert proqramı keçiriləcək. Onun səfəri Röyanın konserti ərəfəsinə təsadüf etdiyindən xanım sənətçilərin bir səhnədə çıxış etməsi ideyası yaranıb.

Danışıqlar müsbət nəticə verib. Mətbuat katibinin sözlərinə görə, Alla Puqaçova ilə birlikdə onun uzun illər tərəf-müqabili və həyat yoldaşı olan Filip Kirkorovun da Bakıya səfəri gözlənir. Röyanın konsertində kişi müğənninin də eyni səhnə çıxışı ola bilər.

Mətbuat katibinin bildirdiyinə görə, Röyanın konserti bu və digər maraqlı məqamları ilə yadda qalacaq:

- Alla Puqaçovanın Röyanın konsertində iştirakı tarixə düşən bir gün olacaq. Var gücümüzlə çalışırıq ki, konsert maraqlı keçsin. Artıq dekorasiyalar üzərində işlər başlayıb. Teatrın səhnəsinə uyğun tərtibatda səhnə görüntüləri hazırlanır. Eyni zamanda, böyük bir komanda ssenari üzərində iş aparır. Röyanın konsert üçün geyimləri tikilir. Bunlar sadə və repertuarla vəhdət təşkil edən geyimlər olacaq.

Mətbuat katibi daha bir məsələyə toxundu. Bildirdi ki, Röyanın konsertinə onunla küsülü olan bir neçə həmkarı dəvət olunub. Bildiyimiz kimi, Röya böyük səhnədə parlayandan bəri onun xalq artisti Aygün Kazımova ilə "soyuq müharibəsi" davam edir. Zamanla bir-birinin ünvanına xoşagəlməz fikirlər bildirən müğənnilərin, nəhayət, barışacağı deyilir. İlk addımın isə Röya tərəfindən gələcəyi gözlənilir.

Öyrəndik ki, müğənninin konsertinə dəvət alan həmkarları sırasında Aygün Kazımovanın da adı var. Röya bunu gizlətmədən bəyan edilməsini deyib. Mətbuat katibi söylədi ki, konsert ərəfəsində Aygün xanımın dəvətnaməsi ünvanına çatdırılacaq. Eyni zamanda, Röya ilə münasibətlərində soyuqluq olan Namiq Qaraçuxurlu və Faiq Ağayev də həmin konsertin dəvətliləri sırasındadır. Mətbuat əlaqələndiricisinin dediyinə görə, adıçəkilən sənətçilərlə Röyanın isti münasibətləri olub. Lakin bəzi məqamlarda onların dostluğuna kölgə salmaq istəyənlər tapılıb.

Röyanın konsert repertuarı da təzələnir. Tamaşaçılarına bir yeni klipini və bir neçə yeni mahnılarını təqdim etmək arzusunda olan Röya hazırda bu yöndə çalışmalarını davam etdirir. Onun hansı mahnı müəllifləri ilə çalışdığı və konsertdə nə ifa edəcəyi isə yaxın günlərdə bəlli olacaq.