"Ən böyük arzum Otellonu oynamaq idi"

"İndi peşəkar aktyor nəsli yetişmir. Onların arzuları, iddiaları çox böyükdür. Amma iddianın qabağında nəsə ortaya qoymaq lazımdır. Bizim dövrümüzdə bu iddianı irəli sürən yox idi. Gənclər işləyirlər, ancaq ürəkdən tikan çıxara bilmirlərsə, nəyə lazımdır bu? Aktyor rolu əxz etmədisə, özəlləşdirmədisə, daxilən hiss etmədisə, onu oynamasa yaxşıdır. İndi bizdə belə aktyorlar yoxdur. Aktyorluq Allah tərəfindən verilən vergidir. Mən bu vaxta kimi bacara bilməyəcəyim, özümünkü etmədiyim rolu oynamadım. Mənə görə, kinoda işləmək çox çətindir" - xalq artisti Muxtar Maniyev belə deyir. Aktyor sözünə davam edir:

- Peşəkar olmaq üçün gərək hər bir aktyor dünya kitabxanasını töküb oxusun. Gecə-gündüz oxumaq istəyi isə azərbaycanlılarda yoxdur.

- Tələbələrinizin aktyorluq bacarığı hansı səviyyədədir?

- Uzun illərdir Azərbaycan Milli Konservatoriyası nəzdində aktyor sənəti kursunda dərs deyirəm. Çox istedadlı tələbələrim var. Tələbələrimə ilk verdiyim məsləhət odur ki, yalan danışmasınlar. Aktyor sənəti ilə yalan düz gəlmir. Gərək səmimi olasan.

- Azərbaycan kinosunun dünya səviyyəsinə çıxa bilmədiyinin səbəbi nədir?

- Bunun üçün güclü təbliğat lazımdır.

REKLAM

Ola bilər ki, çox gözəl istehsalımız var, ancaq onu gözə soxmağa adamımız yoxdur.

- Son illər Azərbaycan kinosunda itki çox olub. Nəsil dəyişir, bəs onların yerini tutanlar olacaqmı?

- Bu dünyada heç kim başqasının yerini tuta bilməz. Hər kəsin öz yeri var. Baxın, Milli Dram Teatrında barmaqla sayılacaq qədər aktyor qalıb. Yoxdur, yerlər boşdur. Bu yerləri tutan da yoxdur. Eyni zamanda yazarlar, ssenariçilər arasında da seyrəlmə müşahidə olunur. İndiki ssenariçilərin, rejissorların işi odur ki, kiməsə ağız büzsünlər. Bununla iş əmələ gəlmir. Hamısı deyir ki, mən bundan da yaxşı edərdim, ancaq edə bilmir. Ağız büzməyə nə var ki? İnanın ki, son iki-üç ildə kamil bir ssenari oxumadım. Bu, dəhşətdir. Həsən Seyidbəyli ilə düz bir həftə evin qapılarını bağlayıb "O qızı tapın"ı yazdıq. O yazırdı, mən səhifələyirdim.

- Son illər sizi televiziya tamaşalarında da görmürük. Bu sizin seçiminizdir?

- Müraciət etmək ağlımdan keçməyib. Özləri mənə layiq rol görsələr, yəqin, çağırarlar.

- Maddi vəziyyətiniz necədir?

- Mən aza qane olan insanlardanam. Allah ruzimi yetirir. Vaxt olub işə pulsuz gəlib-getmişəm. Beş manat az, beş manat çox - onunla iş düzəlir? Dünyanın ən kasıb aktyorları Azərbaycan aktyorlarıdır. Şükür Allaha, evim var, işim var, balalarım xaricdə təhsil alıb gəliblər. Əslində maddi cəhətdən həmişə nəsə çatışmır. Özünü oda-közə vursan da, yenə alınmır. Hərdən sual edirlər ki, ürəyinizdə hansısa rolu oynamaq arzusu qalıbmı? Əlbəttə, qalıb. Oynamaq istədiyim rollar çoxdu. Ancaq ən böyük istəyim Otellonu oynamaq idi. Qismət olmadı.