Bir qrup QHT lideri və hüquqşünas Bakı şəhərində aparılan söküntü və təmir işləri ilə bağlı Bakı şəhər İcra Hakimiyyətinə, Mədəniyyət və Turizm Nazirliyinə, Fövqəladə Hallar Nazirliyinə və s. informasiya sorğuları ilə müraciət ediblər. "Turan"a daxil olan müraciəti tanınmış hüquqşünaslar İntiqam Əliyev, Ənnağı Hacıbəyli, hüquq müdafiəçiləri Novella Cəfəroğlu, Səadət Bənanyarlı, ekspert Aytəkin İmranova və başqaları imzalayıb.
"Son bir neçə il ərzində Azərbaycanda səlahiyyətli qurumların səsləndirdiyi məlumatlara görə, Bakı şəhərində istismar müddəti bitmiş, yaşı 100-dən çox və qəzalı vəziyyətdə qədim binaların olması iddia edilir", - deyə Hüquq Maarifçiliyi Cəmiyyətinin hüquqşünası Nurlana Əliyeva bildirib. Bu cür məlumatlar və həmin binalarla əlaqədar görülmüş və görülməkdə olan tədbirlər şəxslərin mülkiyyət və mədəniyyət hüquqlarının mühafizəsi baxımından suallar doğurur. Belə ki, bu binaların çoxu tarix və mədəniyyət abidələridir ki, onlar milli və beynəlxalq qanunvericiliklə mühafizə olunur. Bu binalarda təmir və ya hər hansı rekonstruksiya işlərinin aparılması, yaxud sökülməsi ciddi qaydalara riayət olunmasını tələb edir.
Bununla bağlı insanlarda yaranmış narahatlığı və çoxsaylı müraciətləri nəzərə alaraq, müvafiq məlumatların və sənədlərin alınması üçün yuxarıda adları çəkilən orqanlara sorğu ilə müraciət edilib. Sorğuda Bakı şəhərində qəzalı vəziyyətdə olan binaların siyahısının olub-olmaması, varsa, binaların və ya evlərin qəzalı binalar siyahısına salınmasının hansı qurum, qurumlar və ya komissiya tərəfindən həyata keçirildiyi, həmin siyahıya salınmış qəzalı binaların neçəsinin sökülməli və bərpa olunmalı olduğu, qəzalı vəziyyətdə olan binaların sökülməsi, bərpası və tikinti işlərinin hansı təşkilat və ya təşkilatlar tərəfindən həyata keçirildiyi və bu barədə qərarın kim tərəfindən və hansı qaydada qəbul edildiyi və s. barədə məlumatlar istənilib.
Əliyeva qeyd edib ki, sorğu bu həftə göndərilib və müvafiq qurumlar 7 gün ərzində onlara cavab verməlidir. Əgər cavab gəlməsə, məhkəmə iddiaları qaldırılacaq. Əliyevanın sözlərinə görə, əvvəllər də vətəndaş cəmiyyəti nümayəndələri mədəniyyət abidələrinin taleyi ilə bağlı sorğularla müraciət edib, lakin bir qayda olaraq, heç bir cavab almayıblar.
"Şəhərin idarə edilməsində vətəndaşların iştirakı" layihəsinin koordinatoru, "İslam, demokratiya və insan hüquqları Mərkəzi" QHT-nin rəhbəri Aytəkin İmranova tarix və mədəniyyət abidələrinin mühafizəsi sahəsində vəziyyətin kədərləndirici olduğunu bildirib. "Müxtəlif vaxtlarda müxtəlif idarələr tərəfindən tərtib edilmiş mədəniyyət və tarixi abidələrin müxtəlif siyahıları mövcuddur. Bununla belə, abidələrin dağıdılması davam edir".
2006-2008-ci illərdə təkcə İçərişəhərin "Azneft" meydanına birləşən hissəsində tarixi əhəmiyyətli 30 bina dağıdılıb.
Üzeyir Hacıbəyov, Şəmsi Bədəlbəyli, Füzuli küçələrində də abidələr sökülüb. Nizami küçəsində (Torqovaya) təmir işləri zamanı paytaxtın mərkəzinin memarlıq görünüşünə böyük ziyan vurulur, binaları qaşıyırlar və müasir daş üzlüklərlə örtürlər",- deyə İmranova bildirib.
"Bakıda qalmaqda olan tarixi abidələri xilas etmək üçün təcili tədbirlər görmək lazımdır", - deyə İmranova qeyd edib.
Bakı meriyası, mədəniyyət və turizm, fövqəladə hallar nazirliklərinin mətbuat xidmətlərindən tarixi və mədəniyyət abidələrinin mühafizəsi üzrə görülən tədbirlər barədə şərh almaq mümkün olmayıb.
Qeyd etmək lazımdır ki, son illər ərzində Azərbaycanda, bir neçə dəfə Bakıda, o cümlədən paytaxtın tarixi mərkəzi olan İçərişəhərdə tarix və mədəniyyət abidələrinin qorunması haqda ən yüksək səviyyədə qərarlar qəbul edilib. Lakin reallıqda İçərişəhərdə binaların sökülməsi və yeni obyektlərin tikintisi davam etdirilir.
|
