Keçmiş Dövlət Tikinti və Arxitektura Komitəsi tərəfindən layihələndirmə və mühəndis-axtarış fəaliyyəti üçün verilən 80-a yaxın lisenziyanın qüvvədəolma müddəti bitib. Dövlət Şəhərsalma və Arxitektura Komitəsinin şöbə müdiri Cahangir Qocayevin bildirdiyinə görə, həmin lisenziya sahibləri yeni lisenziyalar almayınca onların fəaliyyəti qanunsuz hesab olunacaq. Odur ki, lisenziya müddəti bitən hüquqi və fiziki şəxslər təzədən quruma müraciət etməli və öz lisenziyalarını təzələməlidir.
Lisenziya müddəti bitənlərin fəaliyyəti İnzibati Xətalar Məcəlləsinə ziddir. Həmçinin onların layihəsi ekspertizaya buraxılmayacaq. C.Qocayevin sözlərinə görə, lisenziyası bitən şirkətlərin fəaliyyətinə rast gəlinərsə, onlar cəzalandırılacaq.
Lisenziya müddəti bitənlərin siyahısında "Memar" MMC, "Riyad" şirkəti, "STİL-S" MMC, "TAMAY" firması, "Şərq" MTK, "Geoloq" MMC, "Atlant" firması və digər şirkət və firmaların adı yer alıb. Qeyd edək ki, lisenziya alınması üçün ödənilən rüsumun miqdarı 1100 manatdır.
|
