Xaricilərin Azərbaycanda yaşamaq hüququ alması üçün ölkəyə nə qədər pul yatırmalı olduqları dəqiqləşib. Doğrudur, əvvəllər söhbət 5-10 min dollarlıq investisiyalardan gedirdi. Nazirlər Kabinetinin qərarı ilə Azərbaycanda yaşayış hüququ almaq üçün ölkəyə 300 min manat və ya 375 min dollar investisiya qoymaq lazımdır. Əlbəttə, 375 min dollarlıq investisiya tələbi ölkəyə nisbətən imkanlı və pul xərcləməyə hazır olanların gəlməsinə şərait yarada bilər. Bu qaydanın xaricdən ölkəyə varlı investorların gəlməsinə kömək edəcəyi güman edilir.
Azərbaycan sürətlə inkişaf edən ölkələrdən biridir və burada işləməyə və pul qazanmağa gələnlər az deyil. Hökumət bu meyldən səmərəli istifadə etmək istəyir. Azərbaycanda yaşamağa ən çox region ölkələrinin - Şimali Qafqaz, Gürcüstan və İran vətəndaşları maraq göstərir. Yaşamaq hüququnun alınması prosedurunun dəqiq müəyyənləşməsi isə bu ölkələrdən faydalı axını gücləndirə bilər.
Bu qayda bütün ölkələrdə var. İndi Azərbaycan da onların sırasına qoşulur. Ekspertlərə görə, bu qayda xaricdən gələnlər üçün bir növ filtr rolunu oynayır. Məsələ bundadır ki, sabitlik və iqtisadi artım şəraitində ölkəyə xaricdən gələnlərin heç də hamısı milyonçu deyil. Onların arasında macəra axtaranlar, adi işçilər, sadəcə təsadüfi adamlar, hətta fırıldaqçılar var. Belələrinin xeyirdən çox ziyanı olur.
Məsələn, Misirdə xaricilərə yaşayış hüququnun verilməsi üçün onun 50 min dollarlıq obyekt alması kifayətdir. Sonradan belələri ölkədə hətta daimi yaşaya bilir. Birləşmiş Ərəb Əmirliklərində - Dubayda yaşamaq üçün daha çox pul qoymaq lazımdır - 1 milyon dirhəm və ya 274 min dollarlıq obyekt alana rezident vizası verilir.
AB-də bu məbləğ 250 min avrodur.
Amma ölkələr arasında fərqli yanaşmalar var, Məsələn, Fransada yaşayış hüququ almaq üçün bura azı 150 min avro pul qoymaq lazımdır. İnvestisiyanın çoxluğu rəsmiləşdirmə proseduruna təsir edir. Məsələn, 1 milyon pul qoyanların məsələsi avtomatik həll olunur. Bolqarıstanda yaşamaq üçün 500 min dollar qoymaq lazımdır. Məbləğ 1 milyon olsa, həmin şəxsə Bolqarıstan prezidentinin fərmanı ilə vətəndaşlıq verilir. 350 min dollar xərcləyən şəxs Karib ölkələrində, məsələn, Dominikanda da vətəndaşlıq ala bilir. Bunun üstünlüyü odur ki, Dominikan pasportu ilə dünyanın əksər ölkələrinə vizasız getmək olur.
Daşınmaz əmlak almaq dünyanın hər yerində sərfəlidir. Amerika hökuməti ölkənin daşınmaz əmlak bazarını, ümumiyyətlə, iqtisadiyyatını canlandərmaq üçün çoxdan sınanmış üsula əl atıb. Birləşmiş Ştatlar 500 min dollardan artıq sərmayə yatıranlara yaşamaq hüququ, yəni "Qrin kart" verməyə hazırdır.
ABŞ-da tətbiq olunan yeni proqrama əsasən ölkədə kommersiya əmlakına, yəni kommersiya obyektlərinə 500 min dollar yatıran xaricilərə 6 ay müddətinə "Qrin kart", yəni bu ölkədə yaşamaq hüququ veriləcək. Bu hüquq həmin şəxslərin özləri ilə yanaşı, 10 nəfər ailə üzvünə də aiddir. Bu barədə "Paramount kapital" və "Paramount emigration servis" şirkətinin birgə məlumatında bildirilir. Başqa sözlə, lazımi qədər pulun olsa, Amerikada yaşamağın mümkündür.
ABŞ-da biznes miqrasiyası elə indiyə qədər mövcud idi. Amma indi bu proses daha da sadələşib. Məsələn, əvvəlki qaydalara görə, Amerikada yaşamaq hüququ almaq istəyənlər bu ölkədə biznes qurmalı, iş yerləri açmalı və şirkəti idərə etməliydilər. İndi isə, sadəcə, kommersiya obyekti almaq kifayət edir. Məlumatda bildirilir ki, Amerikada daşınmaz əmlak alanlar əvvəlcə ölkədə məhdudiyyət qoyulmadan yaşamaq və işləmək hüququ verən imiqrant investor vizası alırlar. İki ildən sonra onlara daimi yaşayış hüququ, daha sonra isə vətəndaşlıq verilir.
Beləliklə, Birləşmiş Ştatlar ölkə iqtisadiyyatına investisiyalar cəlb eləmək üçün xaricilərə əlavə üstünlüklər verməyə başlayıb. Əslində bu variant hər iki tərəfə sərf edir. Amerikada yaşamaq istəyənlərin sayı həmişə çox olub, deməli, bunun üçün pul xərcləyən də tapılacaq. Amerikanın özü isə bu üsulla ölkə iqtisadiyyatına lazım olan investisiyanı cəlb edə bilir. Görünür, elə bunun nəticəsidir ki, birinci yarım ildə ölkənin ən populyar ştatlarına investisiya qoyuluşları ayda 2 faiz artıb. Bunlar Florida, Nyu-York və Kaliforniyadır.
