Azərbaycan paytaxtında avtomaşına bomba qoyması barədə yalan məlumat verən şəxs tutulub. Bu barədə APA-ya Daxili İşlər Nazirliyinin mətbuat xidmətindən bildirilib.
Məlumata görə, dünən saat 05:00 radələrində Səbail rayonunun Neftçilər prospektində naməlum şəxs "Mercedes" markalı avtomaşını Azərbaycan Respublikası Dövlət Neft Şirkətinin inzibati binasının qarşısında saxlayıb və taksiyə minərək gedib. Şirkətin mühafizəçisi avtomaşının arxa şüşəsinə yapışdırılan mobil telefon nömrəsinə zəng edərək, avtomaşının oradan götürülməsini tələb edib, cavabında həmin şəxs avtomaşının ona məxsus olmadığını bildirib. Lakin 10 dəqiqədən sonra göstərilən telefondan mühafizəçiyə zəng vuraraq avtomaşına bomba qoyduğunu və onun partlayacağını bildirib.
Səbail rayon Polis İdarəsinin 9-cu polis bölməsi əməkdaşlarının keçirdikləri əməliyyat-axtarış tədbirləri nəticəsində müvafiq tədbirlər görülüb, məlumat təsdiqini tapmayıb. Zəng edib yalan məlumat vermiş şəxs Bakı şəhər sakini, 43 yaşlı Elxan Səmədov tutulub. Avtomaşın müvəqqəti dayanacağa qoyulub. Avtomaşının salonuna baxış zamanı oradan narkotik vasitəyə oxşar maddə götürülüb. я Dünən isə saat 21:27 radələrində Qaradağ rayonunda Hüseyn adlı şəxs telefonla "102 zəng xidməti"nə zəng edərək Sahil qəsəbəsindəki ATS-in qarşısına bomba qoyması barədə məlumat verib. "Turan"ın DİN-ə istinadən yaydığı məlumatına görə, Qaradağ rayon Polis İdarəsinin 38-ci polis bölməsi əməkdaşlarının keçirdikləri əməliyyat-axtarış tədbirləri nəticəsində yalan məlumat vermiş Bakı şəhər sakini, 17 yaşlı Hüseyn Atakişiyev tutulub.
|
