"Namaza qadağa var idi bizim hərbi hissədə. Deyirdilər ki, olmaz qılmaq. Mənimçün namaz həyatın mənasıdır". Bunu "Azadlıq" radiosuna keçmiş əsgər Fəxri Hüseynov bildirib. Ona əsgərlikdə namaz qılmağı qadağan ediblər. Deyir ki, gecələr gizlincə, uzanıqlı vəziyyətdə, ürəyində ibadət etdiyi günləri çox olub, zabitlər namaz qılanlara təzyiq edirmişlər. O, məzuniyyət vaxtı məscidə getdiyi üçün cəzalandırılan bir əsgər yoldaşı haqda danışıb:
"Səhəri gün zabitlər çağırdılar o əsgəri, dedilər ki, sən məscidə getmisən, sənin adını siyahıya salacağıq, təxribatçısan. Amma belə təzyiq bizim üçün bir sınaqdır" deyən Fəxri Hüseynov xidmət etdiyi hərbi hissənin adını açıqlamaq istəməyib.
Dini Etiqad və Vicdan Azadlığı Mərkəzinin sədri İlqar İbrahimoğlu deyib ki, Fəxri kimi əsgərlər Azərbaycanda çoxdur, əsgərlərin Konstitusiyada nəzərdə tutulan hüquqları beləcə kobud surətdə pozulur: "Bununla bağlı məlumatları biz araşdırırıq, amma təəssüf ki, Azərbaycanda əsgərin öz komandirindən açıq-aşkar şikayət etməsi müşkül məsələdir, şikayətlər rəsmi olmur deyə biz də hökumətə müraciət edə bilmirik".
MN mətbuat xidmətinin rəhbəri Eldar Sabiroğlu isə deyib ki, orduda namaza qadağa yoxdur: "Belə bir şey yoxdur, şayiədir, insan hüquq və azadlıqlarına aid olan heç bir şeyə orduda qadağa qoyulmur".
Amma parlamentin Müsavat deputat qrupundan olan üzvü, Təhlükəsizlik və Müdafiə Komitəsinin üzvü deputat Pənah Hüseyn bildirib ki, orduda namaza qeyri-rəsmi şəkildə qadağa var, özü də bu, axır vaxtlar ölkədə dini təriqətlərin aktivləşməsindən sonra başlayıb. Bir neçə il əvvələ kimi Azərbaycanda hətta hərbi hissələrdə namaz otaqları da var idi: "Rus ordusunda ayrıca keşiş ştatı var, bu məsələ qanunvericilikdə də nəzərdə tutulub. Azərbaycanda isə belə bir ənənə yoxdur, qanunvericilik də bunu tənzimləmir, amma qadağa da yoxdur, yəni qanunda bu sahədə boşluq var".
Pənah Hüseyn bildirib ki, Konstitusiyada nəzərdə tutulmuş dini etiqad və vicdan azadlığı bütün vətəndaşlara şamil olunmalıdır. Keçmiş əsgər Fəxri Hüseynov isə dövlətindən narazı qalıb, deyib ki, bir il ərzində onun hüquqları hər gün pozulub.
Ekspertlərin fikrincə, Azərbaycan Silahlı Qüvvələrində dini ibadətlə bağlı problemlərin çözülməsi üçün ruhani institutunun yaradılması zərurəti ortadadır. Yeri gəlmişkən, bu yaxınlarda Hollandiya ordusu əsgərlərin dini ibadətlərini rahat yerinə yetirməsi üçün iki müsəlman din xadimini işə götürüb. Bildirildiyinə görə, xidmət göstərməsi nəzərdə tutulan müsəlmanlar orduda azad rejimlə işləyir. Onlar günün müəyyən vaxtı orduya gəlir və bu müddətdə hərbi geyim geyinirlər.
Hərbi ekspert, ehtiyatda olan polkovnik-leytenant Yaşar Cəfərli bildirib ki, etiqadlı insanlara öz dini ayinlərini yerinə yetirmək, öz dininə xidmət etmək istiqamətində şərait yaradılması kimi addımlar mütləqdir və bunlar demokratik dövlətlərdə qiymətləndirilir. Onun sözlərinə görə, Azərbaycan ordusunda ruhani təsisatının yaradılması vacibdir.
"Müstəqilliyimizin bərpasından sonrakı ilk illərdə, 1998-1999-cu illərədək bəzi hərbi hissələrimizdə dini ayinlərin həyata keçirilməsi üçün imkan yaradılmışdı. Hətta məscidlərin tikilməsi üçün də müəyyən düşüncələr var idi. MN-də tərbiyəvi işlər üzrə, səhv etmirəmsə, din xadimi kimi xüsusi bir vəzifə də nəzərdə tutulmuşdu. O zaman bu vəzifədə dindar bir hacı əyləşmişdi. Nəzərdə tutulurdu ki, təkcə Müdafiə Nazirliyində deyil, hərbi hissələrdə də belə ştatlar açılsın. Amma sonradan, 1999-2000-ci illərdən başlayaraq əks addımlar atıldı. Müdafiə Nazirliyində o ştatı ləğv etdilər. Açığı bu addımların səbəbləri barədə məlumata malik deyiləm", - deyə o bildirdi.
|
