Amerika türkləri dünəndən etibarən Google-a qarşı kampaniyaya başlayıblar. Bu ümumdünya axtarış sistemi söz azadlığını pozmaqda ittiham edilir. Kampaniya Amerika Türk Koalisiyası (Turkish Coalition of America) (TCA) qurumu tərəfindən başladılıb.
Amerika türklərinin belə bir tədbirə əl atmaları səbəbsiz deyil. Belə ki, Google bu yaxınlarda TCA-da yerləşdirilmiş və istifadəçiləri "erməni soyqırımı" iddialarını rədd edən sayta gətirən "Don't be Evil" ("Kinli olma!", "Şər-böhtançı olma!" mənasını verir) elanını dayandırmaq qərarını verib. Kampaniya da bu haqsız qərara cavab olaraq başlanıb.
Əvvəllər "Ermənistan", "erməni", "erməni soyqırımı" sözlərinin axtarışı istifadəçiləri TCA-ya gətirirdi və onlar burada əsl həqiqətlə tanış olur, erməni tezislərini alt-üst edən, onların uydurma olduğunu göstərən materiallarla tanış olmaq imkanı əldə edirdi. Bu qrup haqlı olaraq ABŞ Konqresində məlum 252 saylı qətnamənin keçməsinə qarşı da çıxış edirdi.
Google şəbəkəsinin bu qərarı türkləri hiddətləndirmiş, erməniləri isə sevindirmişdir. Google öz qərarını bununla əsaslandırır ki, sistem "ədavət və nifrətin qızışdırılmasına yönəlik elanları qəbul etmir". Amma ermənilərin bu səpkili şər və böhtan işləri Google tərəfindən "ədavət və nifrətin qızışdırılması" kimi qavranılmır.
Google bu haqsız qərarını ermənilər tərəfindən təşkil olunmuş "məktub göndərmə" kampaniyasından sonra bu ilin iyun ayında qəbul etmişdi.
|
