Azərbaycan kosmosa süni peyk çıxararaq kosmik ölkələr sırasında yer almaq istəyir. Payızda isə Bakı və Abşeronda rəqəmsal televiziya efirə çıxacaq. Azərbaycanda rəqəmsal televiziyaya keçidlə bağlı tədbirlər davam etdirilir. Bu işlər 2015-ci ildə yekunlaşmalıdır. Rabitə və İnformasiya Texnologiyaları Nazirliyi isə bu işi daha tez, 2012-ci ildə bitirmək istəyir. Beləliklə, artıq payız aylarında Bakı və Abşeronda eksperiment olaraq rəqəmsal televiziya efirə çıxa bilər.
Azərbaycanın öz süni peykinin yaradılması bir kommersiya layihəsidir. Süni peykin yaradılması Azərbaycana iqtisadi cəhətdən sərfəli hesab olunur. Peyk istifadəyə veriləndən sonra Beynəlxalq Telekommunikasiya İttifaqı Azərbaycanı kosmik ölkə kimi tanıyacaq. Ancaq 5 il ərzində biz kosmik peykə çıxmasaq, bizə verilən pozisiya geri alına bilər. Peyk istehsalçı şirkət tərəfindən Azərbaycan mütəxəssislərinin müşayiəti ilə Baykonurdan orbitə sovet raketləri vasitəsilə buraxılacaq.
Hələlik peykdən əldə edilən gəlir özxərciniödəməyə sərf ediləcək. Peyk orbitdə yerləşdiriləndən sonra 5-7 il əldə edilən gəlir layihəyə sərf edilən xərci ödəyəcək. Ondan sonrakı 15 ildə isə mənfəət gətirəcək. Burada əsas problemlərdən biri süni peykin beynəlxalq bazarlara çıxarılmasıdır. Azərbaycan süni peyk resurslarının təqribən 15-20 faizini özü istifadə edəcək. Qalan 80-85 faizi isə beynəlxalq bazarlarda satılmalıdır. Bununla bağlı bizim ekspertlərimizlə və məsləhətçi şirkətlərlə aparılan işlər onu deməyə əsas verir ki, bu sahədə də problemlər olmayacaq. Çünki artıq Malayziya bizim peykin resurslarının 40 faizini almaq üçün sifariş verib və yerdə qalan 40 faizin satılması üçün də sifarişlər daxil olmaqdadır.
Azərbaycanın süni peykinin hazırlanması 163 milyon manata başa gələcək. Süni peykin hazırlanmasında iştirak edən şirkətlər də artıq məlumdur. Peykin özünə 86 milyon manat xərclənməsi nəzərdə tutulub. Bundan başqa 16 milyon manat isə peykin ehtiyat hissələrinə və idarəetmə sisteminə, 40 milyon manat peykin qaldırıcı raketinin hazırlanması və buraxılması işlərinə, 18 milyon isə 100 faizli sığortaya xərclənib. Artıq sentyabrdan peykin istehsalına başlanacaq və 2011-ci ilin sonuna peyk təyin olunmuş orbitdə yerləşdiriləcək.
|
