Amerikanın Heritage ("İrs") fondunun məşhur analitiki Ariel Koen əmindir ki, Qafqazda bir sıra Amerika diplomatlarının dəyişdirilməsi Vaşinqtonun xarici siyasət kursunun dəyişməsi demək deyil.
"Turan"a müsahibəsində Koen qeyd edib ki, Azərbaycandakı səfirin, Qarabağ məsələsi üzrə Minsk Qrupu həmsədrinin dəyişdirilməsinin ABŞ-ın bu regiondakı prioritetlərinə təsiri olmayacaq.
"Gürcüstanın təhlükəsizliyi məsələləri ilə yanaşı, Qarabağ münaqişəsinin həlli, demokratiyaya dəstək də Vaşinqtonun prioritetləri olaraq qalacaq. Obama administrasiyası Nabukko və Transxəzər qaz kəməri layihəsinin də həyata keçirilməsini dəstəkləyəcək", deyə Koen qeyd edib.
Ekspert Moskvanın Gürcüstanla münaqişəni davam etdirməsinin mümkünlüyü haqda bəyanatını təhlükəli sayır.
"İlk öncə, ABŞ Rusiyanın Gürcüstanla münaqişənin bərpa edilməsi mümkünlüyü haqda bəyanatından çox narahatdır. Rusiya, faktik olaraq, Abxaziyanı zəbt edir, bu isə bütün Cənubi Qafqazın təhlükəsizliyinə hədə ola bilər. Rusiya Gürcüstana qarşı düşmənçilik edərsə, bu, prezident Obamanın Moskva səfərinin yekunlarını puça çıxaracaq", - deyə o qeyd edib.
"İranın nüvə proqramı problemi regionun təhlükəsizliyinə ciddi təsir göstərir. İran Obama administrasiyasının əsas qayğısı olaraq qalmaqdadır. Əgər ilin sonuna qədər biz İranın nüvə proqramı məsələsində nəzərəçarpan irəliləyiş görməsək, ABŞ İranın nüvə arsenalı ilə barışmaq və ya onun yaranmasının qarşısını almaq üçün qəti addımlar atmaq arasında seçim etməli olacaq" - deyə o vurğulayıb.
|
