"Avropa və Azərbaycan bir-birinə lazımdır"
 |
Avropa Hərəkatı Təşkilatının baş katibinin fikrincə, Azərbaycan daha da inkişaf etməlidir
Şənbə, 15.08.2009
|
|
Avropa Hərəkatı Təşkilatının (AHT) baş katibi Dieqo Pinto dünən "Trend" xəbərlər agentliyinin ofisində jurnalistlər üçün mətbuat konfransı keçirib.
Dieqo Pinto bildirib ki, AHT-nin məqsədi Avropa bütünlüyünə nail olmaqdır və bu istiqamətdə hərəkat 60 ildən çoxdur fəaliyyət göstərir. Hazırda dünyanın 43 ölkəsində hərəkatın bölmələri var.
Dieqo Pinto Azərbaycanda səfərdə olduğu üç gün ərzində bir sıra qurum və şəxslərlə görüşlər keçirdiyini bildirib. "Bu görüşlərdə Azərbaycanın Avropaya inteqrasiyası məsələsi müzakirə edilib", - deyə təşkilat rəhbəri görüşlərin məzmunu barədə qısaca açıqlama verib.
Azərbaycanın Avropaya yaxınlaşmasını istəyən xeyli sayda insanlar olduğunu deyən Dieqo Pinto bu insanlara yardımçı olmaq istədiklərini vurğulayıb. "Avropa Azərbaycana lazımdır, Azərbaycanın da Avropada yeri var", - deyə AHT baş katibi bu yaxınlaşmanın qarşılıqlı olmasına işarə edib. Bunun üçün Azərbaycanın daha da inkişaf etməli olduğunu deyən Dieqo Pinto bu zaman təkcə infrastrukturun, iqtisadiyyatın yox, insan haqları və demokratiyanın da inkişafını nəzərdə tutduğunu qeyd edib.
Daha sonra suallara cavab verən baş katib gənc bloggerlər Adnan Hacızadə və Emin Millinin həbsi barədə məlumata malik olduğunu, buna görə narahatlıq keçirdiyini, bu narahatlığını Azərbaycan deputatlarından biri ilə bölüşdüyünü ifadə edib. Hərəkatın Azərbaycan bölməsinin rəhbərliyi daxilində qarşıdurma olmasına dair suala cavab verən Dieqo Pinto bu barədə mətbuata açıqlama vermək istəmədiyini, amma problemin artıq aradan qaldırıldığını deyib.
AHT baş katibi qurumun 2011-ci ildə Cənubi Qafqazla bağlı beynəlxalq konfrans keçirməyi nəzərdə tutduğunu da nəzəra çatdırıb.
|
|
|
Oxşar xəbərlər:
"NABUCCO" ətrafinda siyasi hesablar tam dəqiqləşməyib
Qarabağ Münaqişəsinin Tənzimlənməsinə dair İctimai Şuradan prezidentə təklif
Azərbaycan mətbuatının neçə yaşı var?
Almaniya yığması Bakıya gəlir
Rotterdama ümidlərlə
|
|
|
