İİN Antiinhisar Xidməti Departamentinin rəis müavini Yalçın Məmmədov, Rəqabətin qorunması sektorunun müdiri İlham Şahmirzəyev və baş məsləhətçisi İdrak Ələkbərovun cinayət işi üzrə məhkəmə prosesi başa çatıb. Proses Ağır Cinayətlərə Dair İşlər üzrə Məhkəmədə hakim Əlövsət Abbasovun sədrliyi ilə keçirilib. Bu cinayət işi ilə bağlı qəzetin ötən sayında geniş məlumat vermişik.
Məhkəmənin son mərhələsində çıxış edən dövlət ittihamçısı Çingiz Şükürov təqsirləndirilən şəxslərə verilmiş CM 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma) maddəsini CM-in 312-1.1-ci (vəzifəli şəxsin qərarına qanunsuz təsir göstərmə, yəni nüfuz alveri) maddəsinə tövsif edilməsini istəyib. Prokuror təqsirləndirilən şəxslərin hər birinə 4 il müddətinə azadlıqdan məhrumetmə cəzası təyin edilməsini tələb edib.
Daha sonra prosesdə Yalçın Məmmədovun vəkili Kamandar Nəsibli çıxış edərək bildirdi ki, müdafiə etdiyi şəxsə verilmiş ittiham məhkəmədə sübuta yetirilmədi və rüşvət ittihamı təsdiq edilmədi. Vəkil müdafiə etdiyi şəxsə nufuz alveri ilə bağlı verilmiş ittihamı da qəbul etmədiyini və həmin ittiham üzrə də bəraət verilməsini istədi. İlham Şahmirzəyevin vəkili Akif Əli və İdrak Ələkbərovun vəkili Ərşad Gülməmmədov da məhkəmənin diqqətinə müdafiə etdikləri şəxsin gühansız olmasını çatdırdılar. Hər iki vəkil müdafiə etdikəri şəxslərin barəsində bəraət hökmünün çıxarılmasını istədilər.
Son söz deyən Yalçın Məmmədov bildirdi ki, heç bir günahı olmadan mühakimə edilib. O bildirdi ki, heç kimdən rüşvət istəməyib və heç kimi də bu yola vadar etməyib. Digər təqsirləndirilən şəxslər də günahsız olduqlarını iddia etdilər.
Məhkəmənin hökmü ilə bu şəxslərin hər birinə 2 il sınaq cəzası təyin edilməklə, Yalçın Məmmədova 3 il 4 ay, İlham Şahmirzəyevə 2 il 11 ay, İdrak Ələkbərova isə 2 il 11 ay şərti cəza təyin edilib. Məhkəmədə təqsirləndirilən şəxslərin barəsində olan həbs qətimkan tədbiri dəyişdirilib və onlar məhkəmə zalından azad ediliblər.
İttihama görə, İİN Antiinhisar Xidməti Departamentinin sabiq rəis müavini Yalçın Məmmədov və digər şəxslər nazirin 31 iyul 2008-ci il tarixli Bakının Abşeron rayonunda yerləşən istirahət mərkəzlərində antiinhisar yoxlamalara başlayıblar. avqustun 1-i və 4-ü arasında Novxanı qəsəbəsində yerləşən "Aqva-Park", "Flaminqo" və "Diana"da yoxlamaları həyata keçiriblər. Həmin yoxlamaların nəticəsi olaraq İlham Şahmirzəyev "Diana"nın sənədlərində bir sıra qanun pozuntuları aşkar edib və bundan sonra Yalçın Məmmədovla həmin pozuntuları ört-basdır etmək məqsədilə istirahət mərkəzindən 3 min manat rüşvət istəyiblər. Amma menecer Ələkbər Hüseynov iqtisadi çətinlik yarandığını və 1500 manat vermək imkanının olduğunu deyib. İlham Şahmirzəyev onunla söhbət edəndən sonra nazirlikdə olan Yalçın Məmmədova zəng edib və menecerin 1500 manat təklif etdiyini deyib. Yalçın Məmmədov isə məbləğin az olduğunu deyib, 2 min manat alması barədə İlham Şahmirzəyevə göstəriş verib. Avqustun 4-də İlham Şahmirzəyev və İdrak Ələkbərov istirahət mərkəzinin menecerindən 2 min manat rüşvət alarkən Baş Prokurorluğun Korrupsiyaya Qarşı Mübarizə İdarəsinin və Milli Təhlükəsizlik Nazirliyinin əməkdaşları tərəfindən tutulub.
Daha sonra İqtisadi İnkişaf Nazirliyinin binasında yerləşən xidməti otaqlarında Samir Dadaşov və Yalçın Məmmədov tutulmuşdu. İstintaq dövründə Samir Dadaşovun rüşvət alması barədə ittiham sübuta yetirilmədiyi üçün onun barəsində olan cinayət işinə xitam verilib. Samir Dadaşov İİN Antiinhisar Xidməti Departamentinin rəisi vəzifəsində çalışıb.
|
