İqtisadi İnkişaf Nazirliyi beynəlxalq standartlara cavab verən texnologiya əsasında soyuducu anbar komplekslərinin yaradılması üçün investisiya layihələrinin maliyyələşdirilməsi prosesinə artıq start verib. Belə ki, iyulun 31-də nazirliyin Sahibkarlığa Kömək Milli Fondu soyuducu anbar komplekslərinin tikintisi üzrə sahibkarlıq subyektlərinin təqdim etdiyi 12 investisiya layihəsinin maliyyələşdiriləcəyini elan etmişdi.
Bu layihələr ölkənin 4 iqtisadi rayonunu əhatə edir: Quba-Xaçmaz iqtisadi rayonu üzrə 6, Aran iqtisadi rayonu üzrə 4, Lənkəran və Gəncə-Qazax iqtisadi rayonları üzrə hər birində 1 investisiya layihəsi nəzərdə tutulur.
Anbarlar isə Aran, Lənkəran, Quba-Xaçmaz və Gəncə-Qazax iqtisadi rayonlarında hər biri 2000 tonluq olmaqla meyvə-tərəvəz və digər ərzaq məhsullarının tədarükü, saxlanılması və satışı üçün istifadə olunacaqdır.
Nazirliyin mətbuat xidmətinin məlumatına görə, bu layihələrin maliyyələşdirilməsinə başlayan Sahibkarlığa Kömək Milli Fondu artıq müvəkkil kredit təşkilatları vasitəsilə Aran iqtisadi rayonunda 2, Gəncə-Qazax iqtisadi rayonunda 1 investisiya layihəsi olmaqla 3 sahibkarlıq subyektinə güzəştli kreditlər verib. Ümumiyyətlə isə fonda sahibkarlar tərəfindən Aran iqtisadi rayonu üzrə 14, Quba-Xaçmaz iqtisadi rayonu üzrə 11, Gəncə-Qazax iqtisadi rayonu üzrə 4 və Lənkəran iqtisadi rayonu üzrə 4 investisiya təklifi olmaqla ümumilikdə 33 təklif təqdim olunub.
Həmin iqtisadi rayonlar üzrə fonda təqdim olunmuş 33 sahibkarlıq subyektinin təklif zərfləri Müşahidə Şurasının iclasında sahibkarların və kütləvi informasiya vasitələrinin iştirakı ilə açılıb. Sahibkarlıq subyektlərinin investisiya təklifləri "Azərbaycan Respublikası Sahibkarlığa Kömək Milli Fondunun vəsaitinin istifadəsi Qaydaları"na uyğun olaraq araşdırılıb. Nazirlikdən qeyd edilib ki, soyuducu anbar komplekslərinin yaradılması məqsədilə investisiya layihələrinin maliyyələşdirilməsi üçün sahibkarlıq subyektləri tərəfindən təqdim olunmuş digər investisiya layihələrinin güzəştli qaydada maliyyələşdirilməsi davam etdirilir.
|
