"Doktrina" Jurnalistlərin Hərbi Araşdırmalar Mərkəzi bu aydan etibarən "Hərbi sahədə informasiya əldə etmək mədəniyyətinin inkişafı" adlı layihəsinin icrasına başlayır. Mərkəzdən verilən məlumata görə, 6 ay davam edəcək layihə Açıq Cəmiyyət İnstitutu - Yardım Fondu tərəfindən maliyyələşdirilir. "Doktrina" mərkəzindən verilən bilgiyə görə, layihənin həyata keçirilməsində əsas məqsəd Azərbaycanın vətəndaş cəmiyyətinin hərbi sahədə aparılan islahatlar və baş verən hadisələr barədə məlumat almaq hüququ barədə maarifləndirilməsidir.
"Bu gün iki ayrı-ayrı qütbə baxaq: Müdafiə Nazirliyi Silahlı Qüvvələrdə islahatlar prosesinin normal getdiyini, heç bir problemin olmadığını bəyan edir. Lakin müstəqil və müxalif mətbuat səhifələrində bunlar tamamilə inkar olunur. Mətbuat orduda insan haqlarının pozulması, şəxsi heyət arasında qeyri-sağlam münasibətlərin mövcudluğundan, mənəvi və psixoloji gərginlikdən, ölüm hadisələrindən, cavabdehsizlikdən, zəif təminat və təchizatdan, döyüş qabiliyyətinin aşağı olmasından, hərbi sahədə korrupsiya və rüşvətxorluq hallarından mütəmadi olaraq məqalələr dərc edir. Bir-birini inkar edən - bir tərəfdən yalançı arxayınlıq yaradan həddən artıq təriflər, digər tərəfdən problemləri həddən çox qabardaraq Milli Orduya ümidsizlik doğuran məqalələr cəmiyyəti çaşdırır", - deyə "Doktrina" mərkəzi bildirir.
Mərkəz ekspertlərinin fikrincə, yazılan məqalələrin əksəriyyəti sivil vasitələrlə əldə edilmiş məlumatlara deyil, mülahizələrə, şikayətlərə və fövqəladə hadisə xəbərlərinə, bəzən də təhrif olunmuş, şişirdilmiş, təşviş doğuran xəbərlərə əsaslanır. "Əsl vəziyyət isə çox məhdud saylı vəzifəli şəxslərə məlumdur" - "Doktrina" ekspertlərinin fikri belədir. Onlar vəziyyətin düzəlməsinə, Azərbaycanda hərbi sahədə informasiya əldə etmək mədəniyyətinin inkişafına ehtiyac olduğunu bəyan edirlər.
Mərkəzdən bildirdilər ki, layihə ilə bağlı daha geniş məlumat gələn həftə mətbuat konfransında veriləcək. Layihənin həyata keçirilməsində tərəfdaş təşkilat qismində "Hərbi Jurnalistlər" İctimai Birliyi çıxış edir.
|
