Latviya prezidenti Valdis Zatlersin Azərbaycana dövlət səfərinin proqramı açıqlanıb. Valdis Zatlers 10-12 avqust tarixlərində Azərbaycanda dövlət səfərində olacaq.
APA-nın Latviya prezidentinin mətbuat xidmətinə istinadən xəbərinə görə, səfərin ilk günü V.Zatlersin Azərbaycan prezidenti İlham Əliyevlə görüşü planlaşdırılır. Görüşdən sonra prezidentlərin iştirakı ilə iki ölkənin heyətləri arasında danışıqlar olacaq. Latviya prezidenti həmin gün Azərbaycan parlamentinin spikeri Oqtay Əsədovla görüşəcək, Heydər Əliyev Fondunda olacaq və bir sıra digər rəsmi tədbirlərə qatılacaq.
Avqustun 11-də V.Zatlers Azərbaycanın baş naziri Artur Rasizadə ilə görüşəcək, "Səngəçal Oil" terminalına baş çəkəcək və Azərbaycan-Latviya biznes-forumunda çıxış edəcək. Sonra o, Şəki şəhərinə gedərək ipək fabrikində, Xan sarayı və digər tarixi-mədəni abidələrlə tanış olacaq. Avqustun 12-də Latviya prezidenti Şəki tarix-diyarşünaslıq muzeyində və "Jalə" şirələri istehsal edilən müəssisədə olacaq. Günün ikinci yarısında Latviya prezidenti Bakıda biznes-forumun yekunlarını müzakirə etmək üçün latviyalı sahibkarlarla görüşəcək, Latviya səfirliyində latış icmasının nümayəndələri ilə görüşəcək.
Dövlət səfəri zamanı Latviya prezidentini bu ölkənin xarici işlər naziri Maris Riekstinış, iqtisadiyyat naziri Artis Kampars, rabitə naziri Kaspar Gerhards, parlamentin xarici işlər komissiyasının rəhbəri Andris Berzinış, prezident dəftərxanasının, nazirliklərin, Latviya Sərmayələr və İnkişaf Agentliyinin nümayəndələri, həmçinin 75 latviyalı sahibkar müşayiət edəcək.
Latviya prezidentinin xanımının da öz səfər proqramı olacaq. Səfərin ilk günü o, Azərbaycanın birinci xanımı Mehriban Əliyeva ilə görüşəcək, Talassemiya Tibb Mərkəzinin işi, Azərbaycanın tarixi-mədəni və bədii irsi ilə tanış olacaq.
|
