Cari ilin sentyabrında Bakıda Türkdilli Ölkələr Parlament Assambleyasının növbəti toplantısı keçiriləcək. Bu barədə məlumat verən Parlament Assambleyasının üzvü, Milli Məclisin mədəniyyət məsələləri komitəsinin sədri Nizami Cəfərov toplantıda bir sıra məsələlərin müzakirə ediləcəyini deyib. Millət vəkili bu ərəfədə Bakıda türkdilli ölkələrin dövlət başçılarının zirvə görüşünün də keçirilməsinin nəzərdə tutulduğunu deyib. Komitə sədri son vaxtlar mədəniyyət və incəsənət sahəsində baş verən proseslər, rəhbərlik etdiyi komitədə bu sahədə görülən işlərdən danışdı:
- Milli Məclisin yaz sessiyası çox zəngin oldu. Hətta mən deyərdim ki, bu çağırışda keçirilən sessiyaların içərisində parlamentin yaz sessiyası ən ciddi qanunların qəbul edilməsi ilə yadda qaldı. Xüsusilə illər boyu qalan "Təhsil haqqında" qanun qəbul edildi. Bundan başqa, Mənzil Məcəlləsi, "Bədən tərbiyəsi və idman haqqında" qanun qəbul edildi ki, həmin qanunun qəbulundan 10 ildən artıq bir vaxt keçmişdi. Həmçinin sessiya ərəfəsində bir sıra qanunlara düzəlişlər edildi. Cəmiyyətin müzakirəsində olan televiziya və radio, dini etiqad, qeyri-hökumət təşkilatları ilə bağlı qanunlar müzakirə edilərək qəbul olundu.
- Rəhbərlik etdiyiniz mədəniyyət məsələləri komitəsi üçün yaz sessiyası nə dərəcə əlamətdar oldu?
- Parlamentin yaz sessiyası ərəfəsində mədəniyyət məsələləri komitəsində heç bir qanunun qəbulu nəzərdə tutulmamışdı. Çünki hazırda biz Mədəniyyət və Turizm Nazirliyi ilə birlikdə daha çox "Mədəniyyət haqqında" qanun üzərində işləyirik. "Mədəniyyət haqqında" qanun təxminən 10 il bundan əvvəl qəbul edilib. Ötən 10 il ərzində ölkədə mədəniyyət siyasəti ilə bağlı xeyli məsələlər ortaya çıxıb, mədəniyyət inkişaf edib, Azərbaycan mədəniyyətinin dünyaya inteqrasiyası, eləcə də dünya mədəniyyətinin Azərbaycanda təbliği kimi məsələlər geniş vüsət alıb. Ona görə də, yeni münasibətlər ortaya çıxıb. Bu məsələlərlə bağlı gələn sessiyada ya "Mədəniyyət haqqında" qanunda əsaslı düzəlişlər ediləcək, ya da yeni bir qanun müzakirəyə çıxacaq. Hətta belə bir fikir də var ki, mədəniyyətlə bağlı bir sıra qanunları ümumiləşdirib Mədəniyyət Məcəlləsi adlı geniş bir qanun hazırlayaq. Bunların üzərində iş gedir. Yaz sessiyasında əsasən komitə səviyyəsində işlədik. Ancaq gələn sessiyalarda, yəqin ki, biz bunu bütövlükdə Milli Məclisin müzakirəsinə təqdim edəcəyik. Əsas işimiz budur. Bununla yanaşı, bir sıra qanunlara dəyişikliklər və əlavələr istiqamətində də mədəniyyət məsələləri üzrə komitə fəaliyyət göstərir.
- Mədəniyyət Konsepsiyasının hazırlanması barədə də fikirlər səslənirdi. Bu istiqamətdə işlər hansı mərhələdədir?
- Artıq Mədəniyyət Konsepsiyası hazırlanaraq mətbuatda dərc edilib. Bu istiqamətdə bir sıra müzakirələr də aparılıb. Yəqin ki, həmin konsepsiya da qəbul ediləcək. Bunlar paralel gedən, bir-birinə təsir göstərən məsələlərdir.
- Televiziya və radio rəhbərləri ilə görüş nə zaman mümkün olacaq?
- Yəqin ki, həmin görüşü gələn sessiyada keçirməyə nail olacağıq. Bizim bir sıra planlarımız var ki, onların içərisində ən birincisi məhz budur. Televiziya və radio rəhbərləri ilə televiziya və radiolarımızın mədəniyyət, incəsənət, veriliş siyasəti ilə bağlı geniş müzakirələr aparmaq istəyirik. Yəni burada əsas məqsəd odur ki, həm mövcud qanunlar müzakirə edilsin, həm də bizim televiziya və radiolarımızın mədəniyyət, incəsənət verilişlərinin səviyyəsini yüksəltmək üçün daha nələr edə biləcəyimiz aydınlaşsın. Eyni zamanda, belə bir müzakirələri yaradıcı təşkilatlarla da planlaşdırırıq. Yazıçılar Birliyi, Rəssamlar və Bəstəkarlar ittifaqları və digər yaradıcı təşkilatlarla da görüşlər keçirəcəyik.
|
