Dünən İşgəncələrə Qarşı Azərbaycan Komitəsinin sədri Elçin Behbudov Qızıldaş qəsəbəsində yerləşən 14 saylı ciddi rejimli və Ədliyyə Nazirliyinin müalicə müəssisələrində olub.
Elçin Behbudov APA-ya bildirib ki, öz köməkçisi ilə birgə həmin gün 14 saylı Cəzaçəkmə Müəssisəsində olarkən məhkum, 1967-ci il təvəllüdlü Qazax rayon sakini, Azərbaycan CM 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə təqsirli bilinən Mahmudov Səbuhi Vəli oğlu ilə görüşüblər.
Elçin Behbudovun sözlərinə görə, üçüncü məhkumluğu olan ikinci qrup əlil Səbuhi Mahmudov Cəzaçəkmə Müəssisəsində ona qarşı hər hansı zorakılıq və işgəncə hallarının olmadığını deyib.
Elçin Behbudov Ədliyyə Nazirliyinin Müalicə Müəssisəsində Talış Mədəniyyət Mərkəzinin rəhbəri, "Tolışi sədo" qəzetinin baş redaktoru Novruzəli Məmmədovla da görüşdüyünü deyib. Hüquq müdafiəçisinin sözlərinə görə, Novruzəli Məmmədov həkim nəzarəti altındadır, onun üçün təkadamlıq otaq ayrılıb. Səhhətindəki problemlər isə həyatı üçün təhlükə yaratmır.
Amma hüquq müdafiəçisinin Novruzəli Məmmədovun səhhəti barədə dediklərini məhbusun hüquqlarını müdafiə komitəsi tərəfindən yayılmış müraciət təkzib edir. Müdafiə komitəsindən "Ayna"ya daxil olan məlumata görə, onun vəziyyəti kəskin şəkildə pisləşib:
"Artıq 3-cü gündür ki, Novruzəli Məmmədov xəstəxanadadır. Bu gün (srağagün-red.) onunla görüşən ailəsinin və vəkilinin sözlərinə istinadən, xəstəxanaya köçürüldükdən sonra onun səhhəti daha da ağırlaşmışdır. Məhbus minimal həyat şəraiti belə olmayan (antisanitar, yataq vasitəsiz) ümumi palataya yerləşdirilmişdir. Sərbəst hərəkət edə bilmir, yeyib-içmir, ağrılardan və təngnəfəslikdən əzab çəkir. O hələ də heç bir təcili yardım almamışdır. Ailəsinin "Nə üçün onun bu dözülməz ağrılarına qarşı ilk tibbi yardım etmirsiniz?" sualına "analizlərin nəticələrindən sonra həkim müalicə təyin edəcəkdir" cavabı verilib".
Xatırladaq ki, "Tolışi sədo" qəzetinin baş redaktoru N.Məmmədov İran xüsusi xidmət orqanları ilə əməkdaşlıqda ittiham edilərək 2007-ci ildə Ağır Cinayətlərə Dair İşlər üzrə Məhkəmənin qərarı ilə vətənə xəyanətdə təqsirli bilinmiş və 10 il müddətinə azadlıqdan məhrum edilmişdir.
|
