İyulun 15-də Nazirlər Kabineti "Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları"na dəyişiklik edib. Dəyişikliyə əsasən, şəhid statusu Azərbaycanın azadlığı, suverenliyi və ərazi bütövlüyü ilə əlaqədar qanunvericiliklə müəyyən edilmiş digər hadisələrdə, o cümlədən atəşkəs dövründə döyüş şəraitində olan hərbi hissələrdə və ya daxili işlər, milli təhlükəsizlik orqanlarında döyüş tapşırığının, döyüş təminatı ilə bağlı tapşırıqların yerinə yetirilməsi üzrə xidməti vəzifəsinin icrası zamanı həlak olmuş, itkin düşmüş və məhkəmənin qərarına əsasən ölmüş hesab edilən şəxslərə şamil olunacaq.
Bu dəyişiklik indiyə qədər atəşkəs dövründə həlak olan döyüşçülərə də şamil ediləcək. Ancaq "Mediaforum" saytı aydınlaşdırıb ki, indiyə qədər atəşkəs dövründə həlak olan döyüşçülərdən hər hansı birinin, belə demək mümkünsə, yiyəsi yoxdursa, ona şəhid statusu verilməyəcək. Məsələ bundadır ki, şəhid statusunun alınması üçün indiyədək atəşkəs dövründə həlak olan döyüşçünün yaxınları Müdafiə Nazirliyindəki müvafiq komissiyaya müraciət etməlidir. Komissiya müraciəti araşdırır, sübut olandan sonra həmin döyüşçüyə şəhid adı verilir. Əgər həmin döyüşçünün yaxın adamı yoxdursa, döyüşçü kimsəsiz imişsə və ya yaxın adamları sonradan vəfat edibsə, onda ona şəhid adının verilməsi mümkün olmayacaq. Çünki bu döyüşçüyə şəhid statusunun verilməsi mexanizmi yoxdur (?!).
Əgər atəşkəs dövründə döyüş tapşırığını yerinə yetirərkən həlak olan hərbçilərin statistikası aparılsaydı, onda yaxın adamının müraciət edib-etmədiyinə baxmayaraq onların hər birinə şəhid statusunun verilmə imkanı yaranardı. Amma belə bir statistika yoxdur...
Müdafiə Nazirliyi mətbuat xidmətinin əməkdaşı Teymur Abdullayev "Mediaforum"a deyib ki, dünyasını dəyişən hər bir hərbçi barədə nazirliyin arxivində məlumatlar toplanır: "Amma konkret olaraq atəşkəs dövründə döyüş tapşırığını yerinə yetirərkən həlak olanlar barədə statistika aparılmayıb"(?).
Onda hazırda yaxın adamı qalmamış, döyüş tapşırığını yerinə yetirərkən həlak olmuş hərbçiyə şəhid statusunun verilmə məsələsi necə həllini tapacaq? Məsələn, Müdafiə Nazirliyinin özü hər hansı hərbçiyə şəhid statusu verilməsi üçün məsələ qaldıra bilərmi? Teymur Abdullayev bildirib ki, həlak olan hərbçinin şəhid statusu alması üçün mütləq kimsə Müdafiə Nazirliyinə müraciət etməlidir: "Heç olmasa qonşusu müraciət etməlidir..."(?)
"Ayna"nın əməkdaşı Müdafiə Nazirliyinin mövqeyi ilə bağlı ekspertlər arasında sorğu aparıb. Ekspertlərin fikrincə, şəhid olanların statistikasının aparılmadığı barədə nazirlikdən deyilənlər təəccüb doğurur. "Ola bilər ki, nazirlik rəsmisinin açıqlamasında hansısa yanlışlıq var. Yox, əgər bu doğrudursa, onda vəzifəli şəxslərin vəzifə səhlənkarlığı etməsi barədə düşünmək olar", - deyə ekspertlər bildirir. Onların fikrincə, məsələyə çox qısa zamanda aydınlıq gətiriləcək.
Yeri gəlmişkən, iyulun 28-də Beyləqanda hərbi hissələrdən birində hərbi xidmət keçən Bakı şəhər sakini Tural Qəhrəmanov vəfat edib. Əsgərin ailəsindən bildiriblər ki, Turalın ölümü ilə bağlı hərbi komissarlığın verdiyi arayışda onun böyrək çatışmazlığından vəfat etdiyi göstərilir. Ailə üzvləri isə Turalın sağlam olduğunu deyir. Onların sözlərinə görə, Tural Qəhrəmanov hərbi xidmətə 10 gün öncə başlayıb. Hərbi Komissarlıqda tibb yoxlamasından keçən Qəhrəmanovun sənədlərində onun tam sağlam və əsgərliyə yararlı olduğu yazılıb.
Ali məktəbi bu il bitirən Tural prezident təqaüdçüsü olub. Faktla bağlı araşdırma aparılır.
|
