Azərbaycan Xalq Cəbhəsi Partiyasının (AXCP) sədr müavini Həsən Kərimovun oğlu müəmmalı şəkildə dünyasını dəyişib. Bu barədə APA-ya hüquq-mühafizə orqanlarından məlumat verilib. Məlumata görə, Rəşad Kərimovun meyidi ötən gecə Neftçilər prospekti - 145 ünvanında aşkar edilib. Onun ölümünün səbəbləri isə məlum deyil. Bu hadisə Həsən Kərimovun ailəsində son iki ayda ikinci faciədir.
Meyit müayinə olunmaq üçün tibbi ekspertizaya göndərilib. Həsən Kərimov APA-ya açıqlamasında oğlunun öldüyünü təsdiqləyib: "Rəşad ötən gecə huşsuz vəziyyətdə Neftçilər prospektində tapılıb. Onu xəstəxanaya aparsalar da, xilas etmək mümkün olmayıb". Oğlunun ölümünün səbəbləri barədə hələlik heç bir şey deyə bilməyəcəyini vurğulayan Həsən Kərimov Rəşadın meyidinin üzərində heç bir zorakılıq əlamətlərinin aşkarlanmadığını deyib.
Kərimovun yaxınlarının "Turan"a verdiyi məlumat bundan xeyli fərqlidir. Deyilir ki, 30 yaşlı Rəşad Kərimov iyunun 30-da dəniz vağzalında olarkən ürək tutmasından halı pisləşib və xəstəxanaya çatdırılıb. Daha sonra isə xəstəxanada vəfat edib.
Məlumata görə, hüquq-mühafizə orqanları onun kimliyini müəyyən edə bilməyib. İyulun 6-da Rəşad Kərimov Yasamaldakı kimsəsizlər qəbiristanlığında torpağa tapşırılıb. Kiçik qardaşın torpağa tapşırıldığı gün böyük qardaş 32 yaşlı İftixar da qəflətən ürək tutmasından vəfat edib. Beləliklə, hər iki qardaş bir gündə, amma ayrı-ayrı qəbiristanlıqlarda torpağa tapşırılıb.
Məlumata görə, ailə üzvlərinin başı böyük qardaşın dəfninə qarışdığından kiçik qardaşdan bir müddət xəbər tuta bilməyiblər. Böyük qardaşın dəfnindən az sonra ailə üzvləri Rəşadın itməsi ilə bağlı hüquq-mühafizə orqanlarına müraciət ediblər. Uzun axtarışdan sonra, nəhayət, iyulun 31-də Rəşad Kərimovun vəfat etdiyi və dəfn edildiyi bəlli olub...
|
