Ermənilərin yaşadıqları ölkələrdə elektron saytlar yaradaraq rəy formalaşdırmağa xəbis cəhdlər göstərdikləri yeni məsələ deyildir. Ukrayna İnternet məkanında rast gəldiyimiz analitika.at.ua portalı buna bariz örnək idi. Rəhbəri erməni milliyyətindən olan Ukrayna vətəndaşı Marat Akopyandır. İnformasiya-təhlil məzmunlu portal olduğunu bəyan edən sayt özünü "milli azlıqlar mövzusunda Ukraynadan məlumat yayan aparıcı mənbələrdən biri" hesab edir. Məsələyə prinsipial mövqedən yanaşdıqda burada təəccüblü və ya qısqanclıq doğuran (xüsusən bir azərbaycanlı kimi nəzərə alsan ki, portalın müəllifi ermənidir) heç bir məqam yoxdur.
Sadəcə, portalın cəlbedici adı və rəhbərinin kimliyi və gördüyü işlər bizdə maraq oyatdı və onunla tanış olmaq qərarına gəldik. Kiçik araşdırma nəticəsində müəyyən edə bildik ki, portalın serveri Rusiya ərazisində yerləşir... İkincisi, qısa tanışlıqdan sonra portal barəsində bizdə iki təəssürat oyandı: birincisi, "analitika" anlayışı ermənilər üçün onların təfəkkür dünyasına yad olan məfhumlara münasibətdə dezinformasiya və diskreditasiya xarakterli məlumatların yayılmasıdır; ikincisi və üzərində daha geniş dayanmaq istədiyimiz "milli azlıq" anlayışı.
Demə, özlərini "milli azlıqlar mövzusunda Ukraynadan məlumat yayan aparıcı mənbələrdən biri" kimi təqdim edən saytın sahibləri üçün Ukraynada yalnız bir "milli azlıq" mövcuddur ki, o da ermənilərdir. Çünki portalın materialları ilə tanış olduqda Ukrayna əhalisinin təqribən 0,2 faizini təşkil edən erməni milli mənsubiyyətinə məxsus şəxslərdən başqa, "milli azlıq" adlandırıla biləcək digər milli-etnik subyektlərin problemlərindən, qayğılarından bəhs edən hər hansı bir məlumata rast gəlmədik.
"Analitika.at.ua" portalı özünün bütün analitik potensialını "əzilmiş və hüquqları tapdanmış" ermənilərin "haqq səsini" dünyaya duyurmağa yönəldib. Onların təqdimatında "iqtisadi çətinliklər və hakimiyyət didişmələri nəticəsində normal həyat ritmindən çıxan, problemlər bataqlığını xatırladan Ukraynada yeganə işıq yeri qəlblərinə sevgi və xeyirxahlıq hissinin hakim kəsildiyi erməni "milli azlığı"dır".
Ukrayna dövlətinin həyata keçirdiyi xarici siyasi kurs ukraynalı ermənilərin narazılığına səbəb olan digər bir məqamdır. Onların görümündə GUAM - "soyuq müharibə"nin qalığıdır" (!?), odur ki, məzlum erməniləri hiddətləndirir. Onlar xüsusən də GUAM-da təmsil olunan Azərbaycanı (və Gürcüstanı) regionda bölücü siyasət yürütməkdə, Türkiyə-Ermənistan əlaqələrinin inkişafına əngəl törətməkdə ittiham edirlər... Xoruzun quyruğu göründüyü üçün, burada nöqtə qoyuruq.
|
