Bu gün Atatürk Mərkəzində "Parlament və media münasibətləri: mövcud vəziyyət, əməkdaşlığın perspektivləri" mövzusunda "dəyirmi masa" keçirilib.
"Media forum" saytının məlumatına görə, Parlament Jurnalistləri Birliyinin təşkil etdiyi toplantıda millət vəkilləri və Milli Məclisin fəaliyyətini işıqlandıran media mənsubları iştirak ediblər. Parlament Jurnalistləri Birliyinin sədri Elşad Eyvazlı bildirib ki, bu mövzuda "dəyirmi masa"nın təşkil olunmasında məqsəd jurnalistlərin parlamentin fəaliyyətini hansı formada işıqlandırması, Milli Məclislə media mənsublarının əməkdaşlığı və mövcud problemlərin aradan qaldırılması üçün işlər görməkdir. Onun sözlərinə görə, hazırda bəzi dövlət qurumlarından fərqli olaraq Milli Məclis media ilə əməkdaşlıqda xüsusilə seçilir. Amma bəzi problemlər hələ də qalır.
Milli Məclisin mədəniyyət komitəsinin sədri Nizami Cəfərov çıxışa jurnalistləri tənqid etməklə başlayıb. Komissiya sədri qeyd edib ki, parlament-media münasibətləri daim ciddi bir məsələ olub: "Amma hazırda media Milli Məclisin fəaliyyətini lazımi səviyyədə işıqlandıra bilmir. Jurnalistlər arasında fikir müxtəlifliyi çox zəifdir. İzahat işləri lazımi səviyyədə deyil. Parlamentin fəaliyyətini işıqlandırmaqda jurnalistlərin təcrübəsi də azdır. Həddən artıq sxematizm mövcuddur. Parlamentə daim jurnalist təzyiqi olmalıdır. Amma bu, hiss olunacaq səviyyədə deyil". Onun fikrincə, media hansısa bir qanunun qəbulu zamanı ictimaiyyətə geniş məlumat verməli, qanunun işlənmə mexanizmi barədə analitik yazılar yazılmalıdır.
N.Cəfərovun fikirlərinə jurnalistlərdən öncə deputat Pənah Hüseyn cavab verib. O deyib ki, Milli Məclisdə akkreditə olunmuş jurnalistlər informasiyaların cəmiyyətə ötürülməsində ciddi işlər görürlər: "Parlamentin fəaliyyəti lazımi səviyyədə işıqlandırılır. Qanun layihələrinin qəbulu zamanı baş verən anlaşılmazlıqlar isə jurnalistlərin günahı deyil. Çünki jurnalistlər qanun yaradıcılığı prosesində iştirak etmirlər. Komitələrin iclaslarına daim eyni jurnalistlər çağırılır. Buna görə də plenar iclasda qanunlar qəbul olunarkən media mənsubları əziyyət çəkirlər".
Deputat Sabir Rüstəmxanlı son dövrlər jurnalistlərin araşdırma yazıları yazmadıqlarından şikayətlənib. Amma parlamentin fəaliyyətinin işıqlandırılmasında jurnalistlərin əməyinin böyük olduğunu deyən S.Rüstəmxanlı problemlərin aradan qaldırılması istiqamətində iş görülməsini vacib sayır. Toplantıda media mənsublarının üzləşdikləri problemlərdən danışıblar. Onlar bildiriblər ki, hələ də komitələrin və digər iclasların işıqlandırılması üçün telekanalların kameralarına qoyulan qadağa aradan qaldırılmayıb. Komitələrin iclaslarına yalnız eyni qəzet və elektron KİV-lərin müxbirləri dəvət edilir.
Deputat Gültəkin Hacıbəylinin sözlərinə görə, Milli Məclis jurnalistlərin hesabına sosial problemlərini həll edir. Amma bu qurum medianın sosial problemlərini həll edə bilmir: "Mən burda sadalanan problemlərdən xəbərsizəm. Jurnalistlərin qanun yaradıcılığı prosesində iştirakı lazımdır. Eyni zamanda komitələrin keçirdiyi müzakirələrdə də jurnalistlər olmalıdırlar". Deputat Qənirə Paşayeva təklif edib ki, Milli Məclislə media arasında olan problemlər barədə Parlament Jurnalistləri Birliyi bir material hazırlayıb rəhbərliyə təqdim etsin: "Həmin sənədə jurnalistlərlə yanaşı, deputatlar da imza atsınlar. Belə olan halda mövcud problemlərin həllinə nail olmaq olar".
|
